Жирохов Дмитрий Афанасьевич

Жирохов Дмитрий Афанасьевич 1941 сыллаахха сэрии саҕаламмыта. Фашистскай Германия Советскай Союһу сэриилээбитэ. Сэрии кэмигэр дойдубутугар фронт уонна тыыл баар буолбута. Фроҥҥа ньиэмэс армиятын утары кыһыл армия сэриилэспитэ. Тыылга кыргыттар, ийэлэр, эбээлэр, оҕолор хаалбыттара. Кинилэр бурдук үүннэрэллэрэ, ынах ыыллара, мас кэрдэллэрэ, заводка, фабрикаҕа танка, самолет, буулдьа оҥороллоро. Олох ыарахан этэ.

Хас биирдии ыаллартан аҕалар, убайдар сэриигэ барбыттара. Өлүөхүмэттэн элбэх киһи сэриигэ барбыта. Кинилэр истэригэр мин хос эһэм, Жирохов Дмитрий Афанасьевич баара.

Хос эһээм 1921 сыллаахха балаҕан ыйын 11 күнүгэр Өлүөхүмэҕэ 1-Нөөрүктээйигэ төрөөбүтэ. Ийэтэ кыра эрдэҕинэ өлбүт. Аҕата улаатыннарбыт. Сэрии саҕаланыытыгар эһэм сэттэ кылаас үөрэхтээх этэ. Олунньу ыйга 1942 сыллаахха сэриигэ ыҥырыллыбыта. Аан бастаан Забайкальеҕа сулууспалаабыт, онтон 1943 сыллаахха 1 Украинскай фроҥҥа 326 дивизияҕа снайперынан барбыт. Манна аан бастаан бааһырбыт. Иркутскайга эмтэнэн баран, дивизиятыгар төннүбүт. Кинини пушканы иитээччинэн туруорбуттар.Радомышль куоракка иккиһин бааһырбыт. Үтүөрээт 6 ыйдаах офицерскай курска үөрэнэргэ бирикээс туппут. Бу офицерскай курска сэриилэһэ-сэриилэһэ үөрэммит. Курсун Украинаҕа саҕалаан Польшаҕа бүтэрбит. Ахсынньы 7 күнүгэр 1944 сыллаахха лейтенант званиятын биэрбиттэр. Сэрии бүтүөр диэри Дмитрий Афанасьевич взвод хамандыырынан сылдьыбыт.

Кыайыы буолан хос эһэм дойдутугар төннүбүт. Нөөрүктээйигэ ол саҕана детдом аһыллан үлэлии турбут. Эһэбин воспитателинэн ылбыттар. Үлэлии сылдьан хос эбэбин кытта көрсүбүттэр. Алта оҕоломмуттар:Афоня, Ваня, Митя, Света, Рубина, Мотя. Бу алта оҕолортон мин эһэм Ваня – Иван Дмитриевич. Кэлин колхуоска, совхуоска ыанньыксыттаабыта, ньирэй көрбүтэ. Онтон бочуоттаах пенсияҕа тахсыбыта.

Хойутаан да буоллар, 1968 сыллаахха Верховнай Совет Укааһынан Кыһыл Сулус орден хос эһэбэр тиийбит.

Аҕа дойду Улуу сэриитигэр хос эһэм бэйэтин кылаатын киллэрбитинэн мин киэн туттабын. Биһиги, оҕолор, эйэлээх олоххо олорорбут иһин өстөөҕү үлтүрүтүспүт эһэм мэлдьи биһиэхэ холобур буолар.Эдэрдэр сэрии буолбатын туһугар кыһаллыахтаахпыт. Мин үлэм бу санааны сырдатар.

 

Толордо: М.Жирохов 6″а» кылааһын үөрэнээччитэ