Явловская Акулина Дмитриевна (1929 г.р.)

 

Хос эбэм Явловская Акулина Дмитриевна 1929с. бэс ыйын 25 күнүгэр Аллараа Халыма Андрюшкино бөһүөлэгэр төрөөбүтэ. Хос-хос эбэм Явловская Анастасия Тарасовна кыра оҕолорун кытта Төбүлэх учаастагар көһөн кэлбиттэрэ.

Хос эбэм Акулина Дмитриевна Хара Таала оскуолатыгар үөрэнэ сылдьан кэлбитэ. Кэлээт «Буденнай» аатынан колхозка сүөһү көрүүтүгэр үлэлээбитэ. Оҕо эрдэҕиттэн кытаанах ыарахан, үлэҕэ үлэлээн кэлбитэ.

Сэрии сылларыгар, 1942 сыллаахха, 13 саастааҕар, эдьиийин кэргэнин Дмитрий Игнатьевич Созоновы, ону тэҥэ Иннокентий Никитович Созоновы кытта (хос эһээбин кытта) Орто Халыма куоракка диэри атынан почта, ындыы таһыытыгар үлэлээбитэ. Оччотооҕу ас-таҥас кэмчи кэмигэр, кыһын уонтан тахса хонукка, сыһыыга хоно-хоно олус кытаанах усулуобуйаҕа үлэлээбитэ.

Онтон 1943 сыллаахха биир сылга Орто Халыма куорат Лобуйа бөһүөлэгэр кирпиичэ оҥоһуутугар колхозтартан биирдии киһини хомуйбуттара, онно хос эбэбин, 14 саастаах оҕону, ол үлэҕэ ыыппыттара.

1944 сыллаахха төттөрү кэлэн колхозка ыччат сүөһү көрүүгэ, ыанньыксытынан, үүт астааччынан үлэлээбитэ. Арҕахтаах бөһүөлэккэ тутуллуохтаах оскуола, кулууп маһын уунан уһааран аҕалыыга эр дьону кытары тэҥҥэ үлэлээбитэ. Сүөһү үлэтэ олус ыарахан, эппиэтинэстээх этэ. 13-14 ыанар ынаҕы кытта ньирэйдэрин бэйэлэрэ көрөллөрө-истэллэрэ. Хотоннорун дьиэ муостатын курдук кылбаччы сууйаллара. Оҕуһунан отторун мастарын бэйэлэрэ тиэйэллэрэ. Отчуот-подочуот диэн кытаанаҕа. Ыһыы-тоҕуу, үлэҕэ хойутааһын диэн суоҕа.

Хос эбэм Акулина Дмитриевна олус тулуурдаах, тугу барытын кыайыгас, сатабыллаах, дьоҕурдаах, бэриниилээх буола улааппыта. Эр дьон үлэтин, кинилэртэн итэҕэһэ суох үлэлиириттэн убаастыыллара, сөҕөллөрө. Бэл, ыһыахха эр дьону кытта мас тардыһан, мүһэ ылан наҕараадаланара.

Кини кыһамнылаах үлэтин туоһулуур элбэх Бочуотунай кырааматалаах. Хас да оройуон, совхоз, зональнай производственнай слеттарга сылдьыбыта.

 

 

Автор: Н.Ноговицын, 6В1 кылаас үөрэнээччитэ.