Волкова Ксения Даниловна (1920-1992 гг.)

Ийэм Ксения Даниловна 1920 сыллаахха Бүлүү оройуонун Кыргыдай нэһилиэгин соҕуруу өттүгэр 30 км-тээх сиргэ “Нахаайап арыылааҕа” диэн алааска күн сирин көрбүтэ. Ийэлээх аҕата Дария уонна Данил Петровтар аҕыйах ынах сүөһүлээх, айахтарын балыктаан – бултаан ииттэр ыаллар эбит. 14 оҕоломмуттарыттан 7 оҕо бэрт кыраларыгар төрөөн баран төннүбүттэр. Оччолорго балыыһа, эмп -томп суоҕа бэрт буолла5а. Сэттэ оҕолоро кэлин атахтарыгар туран дьоһун дьон буола улааппыттара: Мария, Ксения, Илья, Василий (эрдэ өлбүт), Иван, Христофор, Павлина.

Ийэм Ксения Даниловна 18 -19 саастааҕар Мастаахха Свердлов диэн сиргэ олохсуйан олорбут. Онно Гавриил Волковка кэрэгн тахсар. Аҕабыт Аҕа Дойду сэриитин кыттыылааҕа, сэрииттэн этэҥҥэ эргиллэн кэлбитэ. Онон өссө Иосиф уонна Афоня диэн икки уол оҕону төрөппүт, онтон кэлин Вера диэн кыыс оҕоломмута.

Сэрии кэнниттэн бүттэлээх киһи ордон кэлбэтэҕэ, онон аҕабытын Гавриил Софроновиһы, 4 кылаас үөрэхтээх киһини, Модут диэн сиргэ бэрт аҕыйах ыаллаах – сүөһүлээх дойдуну бэрт кыра артыалы салайтара ыыппыттар. Онно аҕыйах сыл үлэлээн баран Бүлүүгэ сайын ыҥыырдаах атынан айаннаан иһэн төбөтүгэр тымыр быстыбытын, бастаан Бүлүү куоратыгар онтон Дьокуускай куоракка ыыппыттар. Ол кэнниттэн сураҕа суох сүппүтэ. Ийэбит 3 кыра кырбас уолаттарын кытта хаалбыта. Мин оччолорго ньолобуой кылааска үөрэнэр этим, Иосиф 3 саастаах, Афоня 1 саастаах этилэр. Ийэбит оҕолорун иитэр кыһалҕаттан Дьооху оскуолатыгар остуорастаабыта. Онтон үлэ көрдөөн Балаҕаччыга тиийбитэ. Балаҕаччыга — Кыргыдайы, Хаҕыныны, Балаҕаччыны аһынан, таҥаһынан, туттар малынан хааччыйар сельпо диэн тэрилтэ баар буола сылдьыбыта. Онно тиийэн, ол тэрилтэ биир аттааҕынан оттор мастарын тиэйэн куонньуктаабыт. Ол кэннэ сельпо хонтуоратыгар уонна маҕаһыыныгар остуорастаан пенсияҕа тахсыар дылы үлэлээбит. Балаҕаччыга туруорбах балаҕаҥҥа Федоровтар (оһохчуттар) диэн Күүлэттэн төрүттээх дьону кытта бииргэ олорбуппут. Ол ыаллар оҕолоро суох этэ. Онон Афоняны көрдөһөн иитэ ылбыттар. Билигин Федоров Афанасий Николаевич Бүлүүгэ олорор, үс оҕолоох. Иосиф Үөһээ Бүлүүгэ олорор, икки оҕолоох. Мин кэргэннээхпин, 3 оҕолоохпун.

Балаҕаччыга үлэлээн олорбут сельпо Халбаакыга көһөн киирбитэ. Ол тэрилтэ үлэһиттэрэ бары ийэбитин билэллэр этэ. Сельпоҕа бэтэрээн үлэһит этэ. Ийэбит Ксения Даниловна “Ветеран труда”, Сталин төбөлөөх фашисткай Германияны кыайыыга аналлаах юбилейнай хас да мэтээллэрдээх, бочуотунай грамоталардаах, элбэх махтал суруктарынан наҕараадаламмыта.

Ийэбит Ксения Даниловна 72 сааһыгар тиийэн баран өлбүтэ. Ийэбит баарын ааспыт олоҕун, үлэтин туһунан сырдык ыраас өйдөбүл биһиги сүрэхпитигэр – быарбытыгар мэлдьи баар.

 

 

Авторы: М.Г.Волков, Г.Петров, ученик 3 класса.