Винокурова Мотрена Егоровна (1912-1990)

 

Эдьиийим киһи киһитэ — Матырыас

Биһиги кырдьаҕас эдьиийбит Винокурова Мотрена Егоровна дьон –сэргэ ытыктыыр, убаастыыр киһитэ этэ. Кини аҕата мин аҕабын кытта ини – бии дьон этилэр. Бииргэ төрөөбүт төрдүөлэр: икки кыыс, икки уол. Матырыас улахан кыыс, онтон икки уол уонна кыра Мачыана төрөөбүттэр.

Эдьиийим 1912 сыллаахха Толоон Эбэҕэ күн сирин көрбүт. Ийэлээх аҕата дьадаҥы ыал. Онон үлэни-хамнаһы барытын үлэлии, сүүрэ-көтө үөрэммит.

Уолаттар: Охонооһой уонна Бүөтүр сэрии кэмигэр саастара ситэн бастакы хомуурга сэриигэ барбыттар. Кинилэр уоттаах сэрииттэн эргиллибэтэхтэрэ, көмүс уҥуохтара кыргыһыы хонуутугар хаалбыттара.

Эдьиийим ыал буолан Винокуров Иван Николаевич диэн киһиэхэ кэргэн тахсан икки уол оҕолонон: Сэмэн уонна Бүөтүр диэн ааттарын ааттатар дьонноммуттара. Ол дьоллоро уһаабатаҕа кэргэнэ 1942 сыллаахха эмиэ фроҥҥа бэбиэскэ тутан сэриигэ барбыт.

1943 сыллаахха эдьиийим “хара суругу” тутан икки кыра оҕотунаан сир-халлаан икки ардыгар туран хаалар… Бу соҕотох дьахтар дьарамай санныгар ыар дьылҕа сүктэриллибитэ, ол да буоллар кини “киһи киһитэ”буолан оччотооҕу кэм сиэринэн үлэ үөһүгэр түспүтэ. Икки уолун батыһыннаран Намҥа от сии киирэн кыстаан тахсыбыттар.

1944 сыллаахха икки огдообо дьон (Васильев Гавриил Николаевичтыын) холбоһон, икки өттүттэн уопсайа биэс оҕолоох буола түспүттэрэ. Кини Хабырыллалыын олус үчүгэйдик ньир-бааччы уһуннук олорбуттара.

Оҕолоро атахтарыгар туралларыгар күүс-көмө буолбуттара. Улахан уолларын Хабырыыс аах кэргэнинээн Маайалыын сүөһү үлэтигэр үлэлиир буоланнар улахан кыыстарын Агашаны ииттибиттэрэ. күннэрэ-ыйдара киниттэн тахсара.

Матырыас олус эйэҕэс-сайаҕас, наһаа үөрүнньэҥ, аһыныгас киһи. Кини хаһаайка да быһыытынан олус чэнчис, ыраас туттунуулаах, турбут-олорбут буолара. Мэлдьи сылаас астаах-үөллээх үөрэ-көтө көрсөрө.  Куруук элбэх ыалдьыттаах-хоноһолоох буолаллара, бэйэлэрэ эрэ хоннохторуна чуҥкуйаллара.

Мотрена Егоровна тыылга сыралаах үлэтэ сыаналанан 1946 сыллаахха “Үлэҕэ килбиэнин иһин” Сталин мэтээлинэн наҕараадаламмыта.

Эдьиийим барахсан 1990 сыллаахха, саас 79 хаарыгар сылдьан эмискэ күн сириттэн күрэммитэ…

Мотрена Егоровна сырдык уонна чаҕылхай олоҕун оҕолоро, сиэннэрэ, хос сиэннэрэ, хос-хос сиэннэрэ салгыыллар, аатын ааттаталлар.

Балта, Пестрякова Х.И., СР тыатын

хаһаайыстыбатын бочуоттаах үлэһитэ,

Курбуһах нэһилиэгин бочуоттаах олохтооҕо

 

Автор: МОБУ СОШ №21