Винокурова Мария Николаевна 1929 г.р.

1929 сыл сайын  Тааттынскай нэһилиэгин Хабардьа диэн алааска биэс оҕолоох орто сэниэ ыалга Уйбаныаптар дьиэ кэргэҥҥэ төрөөбүт. Оскуолаҕа үөрэммэтэх. Бэйэтэ ааҕа-суоттуу үөрэммит.

Аҕата Николай Петрович Иванов 1940 сыллаахха үлэ фронугар ыҥырыллан барбыт. Бу сылга ийэлэрэ улаханнык ыалдьан олохтон туораабыт. Онон оҕолор тулаайах хаалбыттар. 1943 сыллаахха аҕалара ыалдьан доруобуйата кыайбакка дойдутугар төннөн кэлбит уонна кадровай булчутунан үлэлээбит. 11 саастаах кыыс оҕо аҕата булчут буолан өлөрбүт түүлээҕин таҥастыырыгар, ыраастыырыгар, сүлэригэр илии-атах, күүс-көмө буолбут. Аҕалара хара тыа эҥэрдээх кыһынын дьиэтигэр аҕыйахта көстөн ааһара. Онон балыстарын, быраатын, дьиэ ис-тас үлэтин эдьиийинээн толороллоро. Сааһын кустаан эдьиийин, балтыларын, быраатын аһатара. Хоргуйан өлбөт сыалтан андаатыраны буһаран мииннээн иһэллэрэ.

Аҕалара бултаабыт булдун, түүлээҕин соҕотуопка быһыытынан оройуон киинигэр туттараллара. Куһа5ан илдьиркэй тириилэри сирийэннэр кээнчэ, үтүлүк тиктэн таҥналлара. 1944 сылтан Мария Николаевна холкуоска сүөһү көрөөччүнэн, ыанньыксытынан, сибиинньэ көрөөччүнэн үлэлээбит. Ол кэмнэргэ үөрэҕэ да суох буоллар ньирэйи, сибиинньэ оҕотун олох кыраларыгар аттыыра, олус үчүгэйдик оһон хаалара эбитэ үһү.

1950 сыллаахха сэрииттэн эргиллэн кэлбит холкуоска үлэлии сылдьар туруу үлэһит Винокуров Николай Дмитриевичтыын холбоһон, барыта 8 оҕоломмуттар. Оҕолорун көрөрүн быыһыгар ньирэйи ынахха эмптэрэн улаатыннарар ньыманы туттан онно хас да сыл үлэлээбитэ. Оччолорго уоппуска диэни холкуос үлэһиттэрэ билбэт этилэр. Механизация суох буолан үлэ барыта илиинэн оҥоһуллара. Ыанньыксыт сүөһү көрөөччү туох баар үлэтин барытын бэйэтэ оҥороро. Кэлин уу баһааччы диэн баар буолбута, ууну хотоҥҥо оҕуһунан буочукуга таһаллара, ону син биир илиинэн таһан сүөһүлэргэ иһэрдэллэрэ. Ити курдук 1968 сылга диэри үлэлээбит. 1969-1974 сылларга Ворошиловка баар детсадка түүҥҥү ньээҥкэнэн, уот оттооччунан үлэлээбит. 1974 сылга сайынын детсад сабыллыбыт. Онтон Тааттыныскай улуус райпотун Холбос сүнньүнэн Даккы учаастагар ларекка биэнсийэҕэ тахсыар диэри атыыһыттаабыт.

Мария Николаевна дьоҥҥо истиҥник сыһыаннаһара, үтүө сүбэһит буолара, өрүүтүн аһа-үөлэ дэлэйэ, бэйэтэ эрэ сатыыр туспа астардааҕа, кымыһы олус үчүгэйдик көөнньөрөрө. Холкуос саҕана дьүөгэтинээн Петрова Матрена Михайловналыын ыһыахха анаан биэлэри ыан кымыс оҥороллоро. Айылҕаҕа сылдьарын олус сөбүлүүрэ, сир астыырын ордороро, айылҕаттан дуоһуйууну ылара. Үлэтигэр олус бэриниилээх, ылбыт соругун толорору ситиһэрэ, үлэни сөбүлүүрэ, таптыыра. Онтукатын махтал суруктар, грамоталар туоһулууллар. «Материнская слава 2 и 3 степени» уонна «Ветеран труда» бэлиэлэринэн наҕараадаламмыт.

Суруйда: У.Собакин, МАОУ СПЛ 4 «г» кылаас үөрэнээччитэ.