Василий Петрович Давыдов-Сыроватскай 1919 с.

Василий Петрович Давыдов-Сыроватскай 1919 с. төрүөх. Үлэ-тыыл бэтэрээнэ, бастакы стахановец-тырахтарыыс этэ. Тыа хаһаайыстыбатын бастыҥнара Дьокуускайга ыытыллыбыт өрөспүүбүлүкэтээҕи сүбэ мунньахтарын икки төгүллээх кыттыылааҕа. Саха АССР сирин оҥоһуутун наркомутта хас да бириэмийэлээх.

Давыдов Василий Петрович 1940 сыллаахха МТС (массыына-тыраахтыр станцията) иһинэн аан бастаан аһыллыбыт аҕыйах ыйдаах кууруһу бүтэрэн, оройуоҥҥа биир бастакынан тырахтарыыс быраабын ылбыта. Онтон ыла тыраахтыр уруулутан түспэтэҕэ. Алдьархайдаах сэрии саҕаламмытыгар дойду салалтата, тыылы бөҕөргөтөр сыалтан, бастыҥ тырахтарыыстары сэриигэ ыҥырбат туһунан Ыйааҕы таһаарбыта. Өрөспүүбүлүкэ оройуоннарын бары нэһилиэктэригэр бэрт аҕыйах тырахтарыыс фроҥҥа барбат анал бронь ылан, холкуос отугар-бурдугар, фермалар тиэйэр-илдьэр үлэлэригэр түүннэри-күнүстэри түбүгүрбүттэрэ.

Василий Петрович сэрии инниттэн бэйэтин курдук хас да эдэр уолу, кыыһы салайан (эр дьон тиийбэтинэн, кыргыттар эмиэ бу ыарахан идэни баһылаабыттара) сүрүн (старшай) тырахтарыыһынан үлэлээбитэ. Кинилэргэ үтүө холобуру көрдөрөн, өрүү инники күөҥҥэ сылдьыбыта, бэриллибит сорудаҕы мэлдьи аһара толороро. Бу туһунан улуустааҕы «Большевиктыы тэрийээччи» хаһыат 1944 сыл ахсынньы 5 күнүнээҕи уонна өрөспүүбүлүкэтээҕи «Социалистическая Якутия» хаһыат 1945 сыл кулун тутар 20 күнүнээҕи 55- гэр суруйбуттарын көрүөххэ сөп. Ол курдук, былаанын 1941 сылга 134,5 %, 1942 сылга 122 %, 1943 сылга 122,5 % уонна 1944 сылга 200 % толортообут. Манна өссө оччотооҕу кырыымчык кэмҥэ олус аҕыйахтык бэриллэр сэлээркэ уматыгы төһөлөөх харыстаабытын эбэн кэбис! «Барыта Кыайыы туһугар!» диэн ыҥырыынан салайтаран, сэниэни-сылбаны, күүһү-уоҕу эһэр сыралаах үлэ түмүгэр бу сүҥкэн ситиһии иһин 1943 сыллаахха Саха АССР сирин оҥоһуутун наркома бастыҥ тырахтарыыс Василий Петрович Давыдовы 1.500 солк. харчынан бириэмийэлээбит. Мантан барытын кэриэтэ дойду Кыайыыга пуондун хаҥатар байыаннай нолуокка уонна сойуомҥа туттуллубут. 1944 сыллаахха Дьокуускайга ыытыллыбыт тыа хаһаайыстыбатын бастыҥнарын өрөспүүбүлүкэтээҕи сүбэ мунньахтарыгар кыттар чиэскэ тиксибит.

Василий Петрович Давыдов- Сыроватскай (ортокутурар) — сүрүн (старшай) стахановец- тырахтарыыс (1944 с.)

  Дьокуускайга ыытыллыбыт тыа хаһаайыстыбатын бастыҥнарын өрөспүүбүлүкэтээҕи сүбэ мунньахтарыгар Василий Петрович иккитэ кыттыбыта. Инники кэккэҕэ уҥаттан 1-кы олорор (1944 с.)

 

 

Автор: С.Федорова 6б кылаас