(27.07.1925 – 01.09.2009)

Сэттэ оҕо күн күбэй ийэтэ, тапталлаах эбэ, хос эбэ, тыыл, үлэ бэтэрээнэ Татьяна Артемьевна Васильева 1925 сыллаахха бэс ыйын 27 күнүгэр Таатта улууһугар, билигин Харбалаах сайылыга буолан турар сиргэ – Төҥүттэҕэ Васильев Артемий Семенович, Анна Сергеевна диэн ыалга төрөөбүтэ. Онон оҕо сааһа Төҥүттэ алааска ааспыта. Бииргэ төрөөбүттэр, эдьиийинээн Вера Артемьевналыын, иккиэлэр. Чычымах 7 кылаастаах оскуолатын ситиһиилээхтик үөрэнэн бүтэриитэ сэрии ыар сыллара сатыылаабыттара. Оччотооҕу ыарахан кэмҥэ кыайыы, кэлэр кэскил туһугар холкуос үлэтин саастыылаахтарын кытта тэҥҥэ үллэстибитэ. Ол курдук, сир оҥоһуутугар нуормаларын толороору түүннэри үлэлииллэрэ. Сарсыардааҥҥа диэри үлэлээн баран хонуу кытыытыгар охтон утуйан хаалаллар үһү, өйүө кыра буолан аччыктаатахтарына тыаҕа ойон тахсан отон үргээн сиир эбиттэр.

31.08.1944–04.09.1945 сс. Дьокуускайга Өрөспүүбүлэкэтээҕи колхознай оскуолаҕа үөрэнэн Хайҕал грамоталаах бүтэрбитэ уонна ветфельдшер идэтин ылбыта.

Дойдутугар кэлэн, Учайтан Уодайга диэри тайаан сытар Амма сирдэринэн бэтэринээринэн анаммыта. Сүрэхтээх-дьулуурдаах эдэр исписэлиис сороҕор атынан, сороҕор сатыылаан, киһи сыратын эрэйэр үлэҕэ сүрдээх бэриниилээхтик ылсыбыта. Ол кэмнэрдээҕи үлэтин ыанньыксыттар Нелтанова Мария Ивановна, Бястинова Парасковья Иннокентьевна наһаа сымнаҕас майгылаах, сүрэхтээх, күлбүт-үөрбүт үлэһит кыыс этэ диэн истиҥник махтана ахталлар.

1948 сыллаахха кулун тутар 8 күнүгэр Афанасьев Виктор Куприяновичтыын холбоһон, Элдьикээҥҥэ Чараҥҥа олорбуттара.

1949 сыллаахха кулун тутар 26 күнүгэр Чычымахха көһөн кэлэн сүөһү көрүүтүгэр, сэбиэт сэкирэтээринэн, кэлин дьыссаакка үлэлээбитэ. Дьоно-сэргэтэ аптарытыаттаан, дьон итэҕэлин ылан, үс төгүл олохтоох сэбиэт дьокутаатынан талыллан үлэлээбитэ. Онон нэһилиэккэ ыытыллар үлэҕэ-хамнаска быһаччы кыттыбыта.

1963 сыллаахха кулун тутар 7 күнүгэр Чычымах дьыссаатыгар медсестранан үлэҕэ ылыллыбыта.

Татьяна Артемьевна оҕолорун орто оскуоланы бүтэттэрээри, 1968 сыллаахха Харбалаахха көһөн кэлбитэ. Маҥнай интернакка ньээҥкэлээбитэ, ол саҕана үс Амма, Победа оҕолоро манна кэлэн орто оскуоланы бүтэрэллэрэ.

1974 сыллаахха Харбалаахтааҕы сельпоҕа техүлэһитинэн  үлэлээбитэ.

1975 сыллаахха пенсияҕа тахсыбыта.

Тарбаҕар талааннаах иистэнньэҥ, туоһунан араас иһити тигэрэ, быысыпкалыыра, дьиэ сүөһүтүн, кууруссатыгар, куруолугар тиийэ, оҕолорун дьон оҥороору сынньанар-сылайар диэни умнан туран иитэрэ.

Ити курдук Татьяна Артемьевна төрөөбүт-үөскээбит, үлэлээбит-хамсаабыт нэһилиэгэр быр бааччы ийэ, эбэ, хос эбэ аатын  сылайар диэни билиммэккэ чиэстээхтик уонна эрдээхтик толорон, бар дьон ытыктабылын ылан, аймах, нэһилиэк ытык кырдьаҕаһа буолар аатын сиэрдээхтик сүгэн олорбута.

Олорбут олоҕун, үлэтин устатыгар үтүө суобастаахтык үлэлээбитин үгүс махтал суруктара, мэтээллэрэ, уордьана кэрэһилииллэр.

Наҕараадата:

«Медаль материнства» 2 истиэпэннээх  мэтээл, 1958 с.

«Медаль материнства» 1 истиэпэннээх  мэтээл, 1959 с.

Материнская слава 3 истиэпэннээх уордьан, 1960 с.

«Ветеран труда» мэтээл, 1983 с.

«За доблестный труд в Великой Отечественной войне 1941–1945 гг.» мэтээл, 1993 с.

«Пятьдесят лет Победы в Великой Отечественной войне 1941-1945 гг.» үбүлүөйдээх мэтээл, 1995 с.

«Ветеран тыла» в связи с 50-летием Победы в Великой Отечественной войне 1941 – 1945 гг.,  бэлиэ,  1995 с.

«Маршал Советского Союза Жуков» мэтээл, 1997 с.

«Ветеран труда» удостоверение, 2003 с.

«Ветеран Великой Отечественной войны» удостоверение, 2003 с.

«Ветерану Великой Отечественной Войны 1941–1945 гг.», Саха Республикатын  үбүлүөйдээх бэлиэтэ, 2005 с.

«Шестьдесят лет Победы в Великой Отечественной войне 1941–1945 гг.» үбүлүөйдээх мэтээл, 2005 с.