Васильев Гавриил Николаевич, Лыткина Мария Евсеевна

Мин хос эһэм Васильев Гавриил Николаевич Уус Алдан улууһун Курбуһах нэһилиэгэр 1916 сыллаахха төрөөбүтэ. Үөрэҕэ суох да буоллар элбэҕи ааҕара уонна ыраастык суруйара үһү. Оччолорго улахан дьону үөрэтэллэригэр үөрэммитэ диэн кэпсииллэр.

Хос эһээм бииргэ төрөөбүт алтыалар. Эһэм оҕо сылдьан илиитин тарбаҕын итиигэ сиэтэн тарбаҕа улахан эчэйиилээх эбит. Онон кини сэриигэ барбатах. Ол хаалан «Кыһыл Хардыы» диэн холкуоска саамай тутаах үлэһитинэн буолбут. Эһээм сэрии кэмигэр улахан сут кэмигэр уонна хоргуйан да сырытталлар холкуостарын сүөһүлэрин барыларын кыстатан күөххэ үктэтэллэрэ үһү.

Хос эһэм Саха Сиригэр промышленность сайдыытыгар эмиэ кыттыспыт эбит. Ол курдук Ааллаах Үүҥҥэ таһаҕас таһыытыгар үстэ-түөртэ сылдьыспытын туһунан анал кинигэҕэ бигэргэтэн тураллар.

Эһэм илиитигэр кыанар, улахан уҥуохтаах, көрүҥнээх уонна күүстээх буолан, от үлэтигэр наар охсууга эбэтэр кэбиһиигэ үлэлиирэ үһү. Кини бастыҥ кыдамаһыт буолан дьон убаастабылын ылбыт. Эһэбит Аҕа дойду сэриитигэр килбиэннээх үлэтин иһин И.В.Сталин төбөлөөх мэтээлинэн наҕараадаламмыта.

Хос эбэм Лыткина Мария Евсеевна эмиэ Уус Алдан I-Өспөҕөр 1917 сыллаахха төрөөбүтэ. Эбэм үөрэҕэ суох, илиитин буукубанан эрэ баттыыра.

Эбэбит сэрии кэмигэр Уус Алдаҥҥа саамай улахан хоргуйуу буолбут нэһилиэгэ буолан, былаан быһыытынан, фроҥҥа балык тутуутугар хомуурга түбэспит. Кыһыннары оройуон нэһилиэктэрин кэрийэ сылдьан мууһу үрдүнэн муҥхалыыллара үһү. Тиэрдиллибит былааннарын аһары толорон Сталинтан махтал сурук ылбыттар. Хос эһэбиниин холбоһон баран биэнсийэҕэ тахсыар диэри холкуоска уонна сопхуоска доярканан үлэлээн элбэхтик социалистическэй куоталаһыы кыайыылааҕа буолбута. Элбэх грамоталардаах, үлэ, тыыл бэтэрээнэ этэ. Сталин төбөлөөх мэтээлинэн, Жуков, Ветеран труда о.д.а. элбэх наҕараадалардааҕа.

Кини алта оҕо күн күбэй ийэтэ. Хос эһэбит эрдэ 46 сааһыгар өлөн, алта оҕотун собус соҕотоҕун атахтарыгар туруоран, үрдүк үөрэхтээн, ыал оҥортоон, сиэттэрин бүөбэйдээн олорбута. Куруук «Кэргэним уһуннук олорбута буоллар өссө дьоллоох буолуом этэ» диэн этэрэ үһү.

Кини сытыары сымнаҕас майгылаах, элбэх кэпсээннээх, өйүгэр бары сыыппараны, история кэрдиис кэмнэрин тутара диэн мин эһэм, кини иккис уола, Гавриил Гаврильевич Васильев кэпсиир.

Мин эбээлээх эһээбинэн киэн туттабын, кинилэр бүтүн норуот уонна дойду кыайыытын туһугар биир да күн сынньаммакка, төрөөбүт дойдуларыгар бэриниилээхтик үлэлээбиттэрэ. Харыстанар диэни билбэккэ, эдэр саас көҥүл көччүйэр дьоллоох кэмин ылыммакка олорбуттарын харааста саныыбын. Кыайыыга мин дьонум кылааттара сүҥкэн.

Н.Прокопьева, 6 кылаас