Тюнгюрядова Татьяна Никифоровна (1928-2021 гг.)

 

Тыылга эмиэ кыайыыны уһансыбыттара

Тюнгюрядова Татьяна Никифоровна 1928 сыллаахха Таатта улууһун Дьиэбэгэнэтигэр Евдокия Васильевна, Никифор Романович Тюнгюрядовтарга төрөөбүтэ. Ийэтэ барыта 24 оҕоломмута, оҕо турбат буолан, кинини абааһыттан күрэттэрэн, түннүгүнэн  атын ыалга 1 сыл ииттэрэ биэрбиттэрэ, ол кэннэ утуу-субуу 3 оҕо төрөөн, 4 оҕо тыыннаах хаалан, удьуору тэниппиттэрэ.

8 сааһыгар оскуолаҕа үөрэнэ киирэр уонна ийэтигэр оҕо көрөргө көмөлөһөн, 3 сылынан оскуолаттан тохтуур. Сэрии иннинэ аҕата колхозка киллэрэн улахан дьону кытта тэҥҥэ үлэлиир. Ол курдук сайынын Дьиэбэгэнэҕэ оттуур- 1 га мунньар, 5 суотай охсор сирдээх. Эһиилигэр 1941 сыллаахха Аҕа дойду улуу сэриитэ туран, колхоз тутаах үлэһитэ буолар. Ол курдук 1 дайааркаҕа – 13 ынах, 13 ньирэй тиксэр. Бэйэлэрэ ынахтарын хомуйан, от охсон, сир таттаран үлэлииллэр. Ол быыһыгар үүттэрин илиинэн эрийэн, арыылаан, собуокка туттаралларын ахтан ааһааччы. 1942 сылтан улахан сут – кураан дьыллар үүнэн, атын дойдуга баран сүөһү аһын булаллара. Кини күүстээх-уохтаах, үлэттэн толлубат улаатан эрэр оҕону эр дьону кытта тэҥҥэ үлэлэтэ ыыталлара. Кыайыы буолбутун үлэлии сылдьан истибитин туһунан этээччи. Бу үлэтин сыаналаан Сталин мэтээлинэн оҕолортон биир бастакынан наҕараадаламмыта.

Сэрии кэнниттэн Таатта совхозка пенсияҕа тахсыар диэри үтүө суобастаахтык дайаарканан үлэлээбитэ. Пенсияҕа тахсаат, кыыһыгар Таатта улууһугар Ытык-Күөлгэ кэлэн сынньалаҥ олоҕу олорбута. Бары сиэннэрин, хос сиэннэрин улаатыннаран, үөрэхтээн киһи гынарга көмөлөспүтэ. Оннооҕор биир сиртэн ырааппатах киһи хос сиэннэрин көрө 2 сыл куоракка киирэн оҕо көрбүтэ.

Кини Кыайыы күнүн уонна ыһыах бырааһынньыгын сөбүлүүрэ. Бэтэрээннэр сэбиэттэрэ уонна олохтоох дьаһалта бэлэх оҥорорун, бырааһынньыкка ыҥырарын сыаналыыра. Бэтэрээн сэбиэтэ Чөркөөхтөн көһөн кэлбитигэр Тааттатааҕы ветуправлениеҕа сыһыарбыта. Бу тэрилтэ биир да Кыайыы күнүн көтүппэккэ эҕэрдэлиирин куруук үөрэ-махтана, сылаастык саныыра.

Татьяна Никифоровна 2 оҕолоох, 6 сиэннээх, 13 хос сиэннээх.

 

 

Автор: Т.С.Винокурова