Троев Иван Гаврильевич 1930 по наст.время

Троев Иван Гаврильевич
Мин эһээм Троев Иван Гаврильевич 1930 сыл тохсунньу 2-с күнүгэр Уус-Алдан улууһун II-с Лөгөй нэһилиэгэр күн сирин көрбүтэ. Бииргэ төрөөбүттэртэн 5 оҕо тыыннаах хаалан улааппыттара, ийэтэ холкуоска ыанньыксытынан, а5ата от, мас-муус үлэтигэр үлэлээбиттэрэ.
Оҕо сааһын ахтыыта: «Улуу Сэрии саҕаламмытыгар 10-ча саастаах оҕо этим. Онно эдэр дьоҥҥо бабыаска кэлэн, элбэх киһи Аҕа дойдуну көмүскүү барбыттара, эр-дьон аҕыйаан, күүстээх үлэҕэ оҕонньоттору кытта кыра уолаттар эрэ хааллахпыт. Сыарҕа оҕуһунан отчуттарга өйүө таһааччынан үлэлээбитим, суолу-ииһи, алаастар ханна баалларын билбэт буолан кырдьаҕастар уруһуйдарынан сирдэтэн отчуттарга суорат уонна үрүҥ ас илдьэр этим. Эһиилгиттэн ыла от охсор массыынаҕа оҕус сиэтээччинэн оҥордулар, онно атах сыгынньах, түөһүм дылыгар диэри сиик уутугар ибили сытыйан сарсыарда оҕустарбын тыа күлүгэр саспыттарын булан-тутан аҕалтыыбын. Киэһэ сытарбар: «Түүн сэрии кэлэн өлөртүөҕэ», — диэн наар куттана саныыбын. Итинник 2-3 сыл ааһар. Сэрии бүтүүтүн саҕана охсор массыынаны ремоннаһар, чочу эрийээччи, хатыыр тииһэ тоһуннаҕына сөкүлүөпкэлээн уларытар — барытын сатыыр буолбутум. Начаалынай оскуолаҕа 3 ый үөрэнэ-үөрэнэ саха ымынаҕа буоламмын наар сыыйаллар этэ.
Сэрии бүппүтүгэр Кыайыы буолла диэн араатардааһын, барабаан охсуута, үөрүү-көтүү бөҕө буолбута. Уус –Алдан Томторун оскуолатын оҕолорун муһан Кыайыы туһунан кэпсээбиттэрэ, мин үһүс кылаас үөрэнээччитэ этим быһылааҕа. Холкуоска улэлиирбэр улахан киьи нуормата ыйга 3 киилэ бурдук хамнастыыллар этэ, онтон миэхэ оҕо диэннэр 1,5 киилэни биэрэллэрэ, ол ыйга хантан тиийиэй? Сарсыарда хааьыга 3 ньуоска бурдугу кытта сиикэй хаптаҕаһы, дьордьуманы эбэн-сабан, хойуннаран сиир этибит. Үлэлээбэтэхпинэ харгыйан өлүөх курдук буоларбыт. Онтон 1946 сыллаахха сарсын-өйүүн окко киириэх саҕана бэйэм от охсор массыынаны өрөмүөннэнэн, сытыылаан, өрүгүлүөпкэлээн от охсооччунан тылламмытым кэннэ Армияттан кэлбит уол мин оннубун былдьаан от охсооччунан киирбитэ, мин төттөрү оҕус сиэтээччинэн үлэлээбитим. 1947 сылтан сайын аайы от оҕустарааччынан холкуоска үлэлээн, кыһынын үөрэммитэ туомнаан, аһыыр-аһаабат кэриэтэ сырыттаҕым. Онтон биир оҕуһунан, биир атынан от тиэйиитигэр анаатылар, хас да сыл оннук, улахан оту онорон тиэйэр буолбутум. Ыһыы үлэтигэр бэлэмнэнэн, бурдук быһан, мас кэрдии, эргэ ампаардары көтүрэн, гааһынан барар тараахтарга горүүчэй бэлэмнээччибит, булуугунан сир тиэрдэрээччибин. Оннук сыл-хонук ааһан үлэттэн үлэҕэ уларыйан, туох да буоллун үлэлээн иһэбин. 2 хас сыл Түүлээҕинэн, Бастакы, Иккис Байаҕантайынан сылгы аһатааччынан да сылгыһыт курдук от үлэтин быыһыгар сылдьыбытым.
2-3 га, саамай улахана 9 га сирдэргэ бурдук ыһааччыбыт, кураан-сут дьылларга бурдук олох үүнээччитэ суох, биирдэ 1943 сыллаахха дьэ ардахтаан үчүгэй сыл үүммүтэ. Ол курдук үлэлээн-хамнаан киьи, кылаабыр оностон, от кэбиһиитин кыайа тутар этибит».
1947 с. – «Кирбиэннээх үлэһит» («За доблестный труд во время ВОВ») мэдээлин бастакынан кини сүгэр;
1956 с. — Комсомол ОбКом-тан грамота туттараллар;
1956 с. – Хамнаһа суох ГАИ общественнигынан үлэлиир;
1958-1974 сс. – үлэ быыһыгар фотограбынан дьарыктанар, оскуола коллективтарын, араас тэрээһиннэри хаартыскаҕа түһэрэн, элбэх түгэннэри үйэтитэр;
1962-1972 сс. – Киинэ установкалара аһыллыбыттарыгар бастаан киинэ моториһынан, онтон уурайан баран киинэ механигынан үлэлээбитэ;
1972 с. – РайПотребСоюзка маҕаһыын сэбиэдиссэйинэн үлэлээбитэ;
1979-1990 сс. – ОхотОбщество бэрэссэдээтэлинэн үлэлиир;
1984 с. – Тыыл (Трудовой фронт) ветерана буолар;
1986 с. – Үлэ ветерана буолар;
1986 с. – Алтынньы ыйыгар пенсияҕа тахсар;
2005 с. – II- Лөгөй нэһилиэгин бочуоттаах гражданина буолар.
Онтон да атын элбэх Грамотата, наҕараадата, мэдээлэ элбэх. Билигин эһээм 95 саастаах, 4 оҕолоох, 8 сиэннээх, 2 хос сиэннээх.
Мин эһээбин олус таптыыбын уонна киэн туттабын!
Аммосова Д 3 «в» кылаас, Аммосов И 8 «г» кылаас.