Титова Анна Николаевна (1936-2003 гг.)

 

Титова Анна Николаевна Үөһээ Бүлүү Мэйик нэһилиэгин Улахан Эбэ алааһыгар 1936 сыллаахха Тиитэптэр диэн ыалга төрөөбүт. Аҕата Титов Николай Алексеевич (1905 с.т.) Мэйик төрүт олохтооҕо.Ийэтэ Афанасьева Христина Петровна (1917 с.т.) Бүлүү Үһүс Күүлэтиттэн төрүттээх. Ийэлээх аҕата ыарахан үлэттэн эрдэ үйэлэммиттэр. Ийэм тулааайах буолан ыал муннугун кэрийэн улааппытын, олох оҕо сааһыттан ханна үлэ ыараханыгар сылдьыбытын хараастан кэпсээччи.

1941 сыллаахха Аҕа дойду сэриитэ саҕаланарыгар ийэм 5-6 саастаах кырачаан кыыс эбит. Оччолорго Мэйик сиригэр Блюхер аатынан “Кыһыл Сайылык” холкуос баара. Холкуос үлэтэ сылы эргитэ бүппэт элбэх буоллаҕа, үлэһит илии тиийбэтэ. Онон кыра оҕолору сайын от үлэтигэр оҕус сиэттэрэллэр эбит. Мин ийэм хас да буолан сайын өҥүрүк куйааска күлүмэннээн, тигиилээн мөхсөр оҕуһу сиэтэ сатаан муҥнаналлар эбит. Кинилэри кырдьаҕас оҕонньоттор дьаһайан, салайан үлэлэтэллэр эбит. “Оҕонньоттор утуйар харахтара суох буолааччы, сарсыарда эрдэ да туруораллара” диэн кэпсээччи.

“Улахан Эбэ аартыгынан Ньурбаттан аччыктаан иэдэйбит, нэһиилэ хаамар дьоннор кэлэн ааһааччылар, ол баран ханна-ханна тиийээхтииллэрэ буолла” диирэ. Сэрии тулаайаҕа журналист, суруйааччы Егор Афанасьев- Кэпсэтээрэп мин ийэм үөлээннээҕэ, кыһалҕалаах оҕо сааһын доҕоро этэ. Мэйиккэ кэллэҕинэ, ийэбин көрсө куруук биһиэхэ түһэр буолара. Мин ийэм Дьөгүөр кэллэҕинэ наһаа үөрэр этэ, кинини отой быраатын курдук саныыра.

Колхоз үлэтин быыһыгар Төбүрүөн диэн хас да биэрэстэлээх сиргэ начальнай оскуолаҕа үөрэнэллэрэ. Начальнай оскуоланы бүтэрбитин кэннэ оҕолору Далыр нэһилиэгэр үөрэтэ диэн сыарҕалаах атынан илдьэллэрэ үһү. “Үөрэнэ барымаарыбыт Киристиинэни кытары саһан хааларбыт, оо акаарылар эбиппит ээ, үөрэҕэ суох хаалар быабыт тардан” диэччи. Киристиинэ диэн оҕо сааһын доҕорунэтэр. Инньэ гынан күрүү оонньуу сылдьыбыттарын, үөрэнэр баҕата суох диэн үөрэҕиттэн тохтоппуттар.

Ол сэрии сылларыгар уу-ньулдьаҕай сааһыгар үлэлээбит үлэтэ сыаналамматаҕыттан хомойооччу. 7 сааһыттан улахан дьону кытары тэбис-тэҥҥэ үлэлээбит, оонньооботох оҕо саастаах сэрии кэмин оҕото Тиитэбэ Аана тыылга Улуу Кыайыыны уһансыбыта диэн чахчы этиэххэ сөп.

1968 сыллаахха ийэм Аана Маай учаастагар торбос көрүүтүгэр үлэлии сылдьан Николаев Николай Илларионовичтыын көрсөн ыал буолаллар, Мэйиккэ олохсуйан дьиэ-уот тутталлар. 1970 сыллаахха бастакы оҕолоро Саргылаана төрүүр. Онтон Сардаана, Юрий, Альберт диэн оҕолонон 30 сыл устата иллээхтик-эйэлээхтик олорбуттара. Аҕатын аатын сүкпүт Коля диэн уол биир сааһын ааһан баран тымныйан ойоҕостотон олохтон туораабыта.

 

 

Автор: С.Н.Николаева, дочь