Тимофеев Егор Калинович

 

Ахтыы

Хос эһэбит Тимофеев Калин Васильевич уонна хос эбэбит Тимофеева Матрена Николаевна Кыһыл Сиэн диэки баар Ат Аттаабыт диэн кыракый, ол эрээри олус кэрэ алааска олорбуттар. Көмүлүөк оһохтоох туруорбах дьиэлээхтэрэ үһү. Бу алаастара Дьөҥкүүдэ эбэ уҥуор баар.

Биһиги эһэбит 78-таах үлэ-тыыл бэтэрээнэ, Түмүк нэһилиэгин бочуоттаах олохтооҕо, 14 сиэн, хос сиэн амарах эһэтэ Тимофеев Егор Калинович тымныы саамай үгэннээн турдаҕына, тохсунньу ый 4 күнүгэр 1935 сыллаахха бэһис оҕонон күн сирин көрбүт. Кини иннинэ убайа Ньукулай, эдьиийэ Өлөксөөн бааллар эбит. Кинилэр кэннилэриттэн икки оҕо төрөөн күн сириттэн маппыттар. Доруобай оҕо төрөөбүтүгэр олус үөрбүттэр, Дьөгүөр диэн сүрэхтээбиттэр. Дьоно үлэлиир буолан, эдьиийэ Өлөксөөн саҥа төрөөбүт быраатын көрөр-истэр, бүөбэйдиир үһү. Алаастарынан олорор дьону бөдөҥсүтүү саҕаламмытыгар «Стаханов» колхозка киллэрбиттэр, онон Бүтэйдээххэ 10-ча ыал буолан чугас-чугас олорбуттар.

Оччотооҕу кыракый колхозтар сайдыы киэҥ аартыгар саҥардыы үктэнэн, үлэ-хамнас күүһүрэн истэҕинэ 1941 сыллаахха сэрии саҕаламмыт.Олох уонна өлүү быһаарыллар күчүмэҕэй күннэрэ үүммүттэр. Оччолорго эһэбит алталаах-сэттэлээх оҕо эбит. Эр дьон кыанар өттө сэриигэ ыҥырыллан барыталаан испиттэр. Убайа Ньукулай Аҕа дойдуну көмүскүүр Улуу сэриигэ 1943 сыллаахха ыҥырыллыбыт. Дьокуускай куоракка тиийэн доруобуйатынан сыыйыллан үлэ фронугар хаалбыт. Колхоз үлэтигэр кинилэри солбуйан кырдьаҕастар, дьахталлар,оҕолор хаалбыттар. Сайынын күн киириэр дылы, күһүнүн им-балай хараҥа буолуор диэри оҕолор ат, оҕус сиэтиитигэр үлэлииллэрэ үһү. Олох уһулуччу ыараабыт. Доҕуот кырата, ас-таҥас татыма. Үлэ күнэ уһуна, техника суоҕа. Колхозтаахтар ол күчүмэҕэйдэртэн толлон турбатахтар. Барыта фронт туһугар диэн элбэхтик этэллэрин эһэбит өйдөөн хаалбыт.

1945 сыллаахха саас үөрэнэ олордохтуруна, учууталлара Николай Спиридонович киирэн сэрии бүппүтүн эппит, оҕолор «Ураа, ураа» хаһыы бөҕө буолбуттар.

Эһэбит Тимофеев Егор Калинович 1955 сыллаахха МТС-ка үлэтин саҕалаабыт. Кэнники «Марха» совхозка эллектригинэн, фермаҕа биригэдьииринэн, онтон пенсияҕа тахсыар диэри тутууга үлэлээбит. Кэргэнэ Тимофеева Татьяна Семеновналыын 1960 сыллаахха ыал буолан аҕыс оҕоломмуттар. Эбээбит 2004 сыллаахха ыалдьан өлбүтэ. Эһэбит билигин!

 

Бэчээккэ бэлэмнээтэ Егорова Валентина Васильевна – Ньурба улууһун, Маар нэһилиэгин “Алгыс” добровольческай түмсүү салайааччыта,

Автор: А.Павлова, 8 а кылаас үөрэнээччитэ, Ахтыыны суруйда В.В.Тимофеева, улахан сиэн