Тарская Матрёна Павловна (20.12.1928 г.р.-)

Ахтыы

      Мин хос эбээм тыыл, үлэ ветерана Тарская Матрёна Павловна ахсынньы ый 20 күнүгэр 1928 сыллаахха Уус – Алдан улууһун I – Өспөх  нэһилиэгэр «Үүнүү» колхоз Остуойка учаастагар төрөөбүтэ. Ийэлэрэ Екатерина Ивановна эрдэ өлөн сэттэ оҕо тулаайах хаалан, аҕалара Павел Семенович  көрөн – истэн, кыһалҕа, эрэй бөҕөтүнэн улаатыннартаабыта. Оҕо сааһа оччотооҕу сиэринэн «Үүнүү» колхоз үлэтин кытары алтыспыта.

1941 сыллаахха атырдьах ыйыгар бастакы хомуурга бииргэ төрөөбүт икки убайа Дмитрий, Николай  сэриигэ ыҥырыллан барбыттара. Иккиэн төннүбэтэхтэрэ. Дмитрий сураҕа суох сүппүтэ, Николай 348 стрелковай дивизияҕа, 1172 стрелковай полкаҕа  сулууспалаабыта. 1942с. олунньу 12 күнүгэр геройдуу өлбүтүн, Тверскай уобаласка Ржевскай оройуонун Кокошино дэриэбинэҕэ көмүллүбүтун туһунан биллэрии кэлбитэ.

Хос эбээм оҕо сааһа  сэрии сылларыгар түбэһэн, суут – кураан ыар олоҕу билэн — көрөн  улааппыта. Ол ыарахан сылларга  «Үүнүү» колхозка  сир солоон, сир тиэрэн, бурдук хомуйан, сүөһү  көрөн, оҕус сиэтэн, от оттоон, тиэйэн улахан дьону кытта тэҥҥэ үлэлээбитэ. Сэрии бүппүтүн истэн наһаа үөрбүттэрин туһунан, сэрии сыллары биирдэ эмит санаан кэлэн кэпсиирин эбээм миэхэ эппитэ. Сэрии саҕаланан ситэ үөрэммэтэх буолан, сэрии кэнниттэн Дүпсэ нэһилиэгэр  киирэн интернакка олорон салгыы оскуоланы бүтэрбитэ.

1953 сыллаахха оройуон киинигэр Бороҕон бөрүөлэгэр көһөн киирэн Уус – Алдан улууһун доруобуйатын харыстабылын  бухгалтериятын систематыгар үлэлээн 1978 сыллааха пенсийаҕа тахсыбыта. Үлэтиттэн тохтообокко  салгыы үлэлээн 1991 сыллаахха бүтэн, бочуоттаах сынньалаҥҥа олорбута. Хос эбээм дьиэҕэ таах олорботох дьоҥҥо сакааска иистэнэн, сиэннэрин көрсөн, оҕуруот олордон, көрөн, сир астаан, дьиэтин иһигэр түбүгүрэн, остуол толору минньигэс астаах дьонун көрсөр үөрэр – көтөр эбит.

2008 сыл сэтинньи ыйыгар  хос эбээбин  ыар ыарыы ылан барбыта.

Үлэлээбит кэмигэр  социалистическай күрэхтэһии кыайылааҕа, тыыл, үлэ ветерана, элбэх Бочуотунай грамоталарынан, дипломнарынан, махтал суруктарынан, «Ветеран тыла 1941 — 1945», «Ветеран труда» (за долголетний добросовестный труд), Улуу Кыайыы 50 – 60 үбүлүөйдээх сылларын, маршал Жуков мэтээллэринэн наҕарадаламмыта.  Мин  хос эбээбинэн  киэн туттабын.

 

Автор: С. Аман, ученик 5г класса