Тарасова-Семёнова Мотрена Евстратьевна

Мин хос эбэм Мотрена Евстратьевна Тарасова – Семёнова Хатарыы диэн сиргэ 1908 сыллаахха күн сирин көрбүтэ. Кэлин хос эһэбэр Семёнов Инокентий Петровичка кэргэн тахсан баран Ньурбаҕанчына нэһилиэгэр Кэйбэлэ диэн сиргэ олорбуттара.

Эһэм бастакы холкуоһу тэрийиигэ, сэбиэскэй былаас ыытар үлэлэригэр олус актыыбынайдык кыттыбыт. Ол курдук, араас тутуулары ыыттарыыга, тыа хаһаайыстыбатын массыыналарын таҥан, оҥорон үлэлэтиигэ бас-көс буолан сылдьыбыт. Кэлин холкуос бэрэссэдээтэлинэн талыллыбыт.  Кини 1942 с. Бэс ыйыгар сэриигэ барбыт. Көҥүл дьоллоох олох кэлэрин туһугар, ити дьыл ахсынньы 10 күнүгэр сырдык тыына быстыбыт, Сталинград куорат анныгар 145,0 үрдэлгэ көмүллүбүт.

Эбэм, сэрии огдообото Мотрена Евстратьевна кэргэнэ сэриигэ барарыгар 6 оҕолоох хаалбыт, биир оҕото эрдэ ыалдьан өлбүт. Биэс оҕотун итиэннэ кырдьаҕас ийэтин Анна Николаевнаны харытын күүһүнэн үлэлээн,  ыал иитэр дьылҕаламмыта. Таарыччы эттэххэ, Солоҕон нэһилиэгин биир биллиилээх киһитэ, бастакы ревкомовец, интеллигент Николай Николаевич Тарасов эдьиийэ этэ.

Хос эбэм Мотрена Евстратьевна эр киһи курдук туруу үлэһит, мындыр булчут, сылык өйдөөх, сытыары сымнаҕас майгылаах эбит. Кыһын табанан, арыт сыл атынан куораттан уонна оройуонун кииниттэн нэһилиэгэр таһаҕас таһара. Итини таһынан эр киһи курдук от-мас, холкуос ыарахан үлэтигэр сылдьыбыт, оҕолорун, ийэтин иитэр баҕаттан бултуур, туһахтыыр эбит. Кэлин ыанньыксыттаабыт, оскуолаҕа остуорастаабыт.

Өссө биэс оҕотун таһынан (ийэтэ Анна Николаевна өлбүтүн кэннэ) оҕолор абаҕаларын, икки хараҕа суох Семёнов Александр Петровиһы өлүөр диэри көрбүт-ииппит. Кини кыһалҕа эрийэн, үчүгэйдик иистэнэр болбут. Онон этэрбэс, үтүлүк тигэн өрүскэ киллэрэн атыылаан, бурдук аҕалан эбинэллэрэ. Куһаҕан эр киһиэхэ бэриллибэт үлэһит, булчут буолан, биэс оҕотун иитэн-аһатан, үтүө дьон гынан атахтарыгар туруортаабыт. Оҕолор бары аҕаларын, ийэлэрин удьуордаан олус талааннаах, үлэҕэ бэриниилээх, эйэҕэс майгылаах дьон бола улааппыттар. Ол курдук, Лазарь бастыҥ уус, Семен, Степан бастыҥ механизатордар,  Коля  табаһыт, булчут, Наталья бастакы учууталлартан биирдэстэрэ. Хос эбэм Мотрена Евстратьевна холкуос бэрэссэдээтэлинэн, биригэдьииринэн үлэлии сылдьыбыт. 1957с. Солоҕон нэһилиэгин депутатынан талыллыбыт.

 

Автор работы: Аар К, ученица 11”Б” класса