Стручкова Анна Тимофеевна (1927 г.р.)

Мин эбээм Стручкова Анна Тимофеевна 1927 сыллаахха төрөөбүтэ. Дьоно кыһалҕалаахтык олорор буолан дьиэни хомуйар, дьаһайар, оҕону көрөр-истэр киһи наада диэн эрдэ оскуолаҕа киллэрбэтэхтэр. Оскуолаҕа 10 саастааҕар үөрэнэ киирбитэ. Уөрэҕэр үчүгэйдик уөрэнэрэ. Кылаас старостата, пионердар баһаатайдара буолбута, общественнай улэҕэ активнайдык кыттара. Сэрии саҕана олус куускэ улэлииллэрэ. Саас мас саһааннаан туруораллара, оскуола сиригэр субботнигынан тахсан биирдии оҕо икки куҥҥэ 1 кубометр маһы сугэнэн кэрдэн туруорара. Иккилии буолан кыттыһан кэрдэллэрэ. 7 кылааһы бүтэрэригэр  оройуон аатыттан Дьокуускайдааҕы педучилищеҕа 150 солкуобай биэрэн туран уөрэттэрэ ыыталлар.

Атырдьах ыйын 1 күнүгэр 1943 сыллаахха Дьарҕалаах бөһуөлэгиттэн Дьокуускайга уөрэнэ барарга 5 оҕо уонна сирдьитинэн биир аҕа аттаммыттара. Аара үрэхтэргэ хаайтаран, ат да ыран, сорҕотугар мэнэстэн иьэн аттарын сир хаспаҕар түһэрэн эрэйдэммиттэр. Ол курдук айаннаан” Кылагырга” тиийэн аттарын төттөру атаарбыттар. Батамайга бараары 5 хонук параход кууппуттэр. Ол курдук Дьокуускайы 38-с хонуктарыгар, балаҕан ыйын 8 күнүгэр булбуттар.

Эбээм Педучилище уопсайыгар олорон үс сыл уерэммитэ. Дьиэлэрэ тымныы буолан истээх таҥастарын кэтэ сылдьан уруоктарын ааҕаллара. Аһылыкка карточка биэрэллэрэ. Арыы, чэй, саахар карточкатын атыылаан килиэп ылыналлара. Биэс кэлбит оҕолортон соҕотох эбээм эрэ үөрэнэ хаалбыта. Биир уолларын тута фронна ылбыттара, атыттар ыалдьан дойдуларыгар төннубуттэрэ. Сайын педучилище подсобнай хаһаайыстыбатыгар Мэҥэ-Хаҥаласка 2 Холгумаҕа тахсан балаакканан сытан от оттууллара, мас мастаан илии эрбиитинэн эрбээн саһаан туруораллара. Эбээбэр иккис сылыгар учугэйдик улэлиигин диэн көстуум тиктэр «Бостон» диэн 3 м. таҥас биэрбиттэрэ.

Аҕа дойду сэриитэ бүтэн Кыайыы күнүн Якутскайга көрсубуттэрэ. Ол күн уулуссаҕа көрсүбүт киһини барытын кытта сылласпыттара, куустуспуттара.

 

Автор: Хос сиэнэ А.Петрова.