Степанова  Анна  Николаевна 1938 с.т.

Степанова  Анна  Николаевна 1938 сыллаахха кулун тутар 15 күнүгэр Бүлүү оройуонугар, Дьооху нэһилиэгэр, колхозтаах дьиэ кэргэнигэр төрөөбүтэ. Ийэтэ Степанова  Ксения Афанасьевна, аҕата Степанов Николай Проокопьевич “Түмсүү” колхозка эдэр саастарыттан үлэлээбиттэрэ. Ийэлээх аҕата үйэлэрин тухары үлэ дьоно буолан  үөрэммэтэхтэр.          Аҕата  Ньукулай колхозка сайынын от үлэтигэр  түүнүн-күнүһүн аахсыбакка үлэлиирэ, үлэҕэ сүрдээх кыайыылаах-хотуулаах, хаһан даҕаны сылайдым-элэйдим диэбэтэ. Кыһынын бэдэрээт тиэйиитигэр сылдьыбыт. Ийэтэ Өксүүн эдэр сааһыттан фермаҕа дайааркалаабыта. Кыра сааһыттан, ийэтигэр, сайынын- күһүнүн  очотооҕу оҕо сиэринэн куруук көмөлөһөрө. Урукку кэмҥэ уот-күөс диэн суоҕа, онон хотон иһэ куруутун күһүн, кыһын хараҥа буолара, ол иһин киэһэ тымтык тыыран бэлэмнииллэрэ. Ийэтин кытта сарсыарда эрдэ тахсыһан ынаҕын сааҕын күрдьэр кэмигэр тымтык уматан биэрдэхтэринэ ону тутааччы буолара, бүттэҕин аайы атыны уматан биэрэллэр эбит.Доярка ийэлээх оҕолор бары көмөлөһөн сылдьыһаллара, кыракый оҕолор торбуйах тардыһан ырычаахтаһаллара. Күһүҥҥү тымныыга  атахтара тоҥногуна ынах иигэр тутан сылытталлар эбит…

Оскуолаҕа, уҥуога кырата бэрдин иһин,  дьонноро 10 саастааҕар киллэрбиттэр. Улааппыт киһи быһыытынан  аны сайынын үөрэх кэнниттэн  үксүн от үлэтигэр үлэлээбит.  Бастаан сиилэс үлэтэ буолара, онно уонча буолан оҕус сиэтэллэр эбит.Сарсыарда эрдэ оҕустарын бэйэлэрэ булан туталлара, сороҕор оҕустара сүөһүлэри кытта баран хаалан эрэйдииллэр эбит.

Аны окко киириэхтэрин иннинэ оҕуруокка үлэлииллэрэ, хортуоска сыыс отун ыраастааһына,илиинэн таһан уу кутааһына. Үксүн Майорова Муза диэн дьүөгэтинээн бииргэ сылдьаллар эбит. Бааһыналара киэҥэ, үөнэ-көйүүрэ оҕо киһиэхэ ыарахан үлэ этэ… Окко Бөтүрүөп таҥара кэннэ киирэллэрэ, оҕолор от кээһиитигэр оҕус сиэтээччинэн сылдьаллара. Элбэхтик оҕус сиэппитин өйдүүр, Дьоохуттан икки-үс көстөөх  хонуктаах  сирдэргэ эмиэ ыыталлар эбит. Итиини  итии диэбэккэ, ыарахан үлэттэн толлубакка, түүнүн тоҥон-хатан  улахан дьонтон хаалсыбакка үлэлэһэллэрэ. Сүрүн аһылыктара собо-балык буолара. Күһүн  үөрэхтэрэ буолара икки-үс хонук эрэ хаалтын  кэннэ  үлэттэн босхолонон дьиэлэригэр киирэллэр эбит. Танас-сап кырыымчык буолан  үлэ быыһыгар отонноон  таҥас таҥналлара.Оскуолаҕа кэтэн барар таҥастарын ийэлэрэ тигэрэ.   Ол саҕана таҥастара  саппыйаан этэрбэс,сиидэс ырбаахы, кыра сон оҕото буолара. Дьоохуттан  Кыргыдайга диэри биэс көһү сатыы ыһыктарын, таҥастарын  сүгэн  үөрэнэ кэлэллэрэ. Кыргыдай сэттэ кылаастаах оскуолатын бүтэрэн Дьокуускайга медсестралар курстарыгар үөрэнэн иһэн, аҕата ыарытыйан төннөн кэлэн дьиэ-уот тэринэн  Кыргыдай төрүт олохтооҕо буолан олорор.  Биэс бииргэ төрөөбүттэртэн  билигин  иккиэйэхтэр, балта Степанова Галина Николаевна 1946 сыллааҕы  төрүөх, педагогическай үлэ бэтэрээнэ.

Кэргэнинээн Чыбыков Семен Алексеевичтыын  педагогическай, тыыл үлэ бэтэрээнинээн түөрт уон тоҕус сыл устата эйэ-дэмнээхтик олорбуттара. Биир кыыс оҕону төрөппүттэрэ, Анна Николаевна икки сиэн, биир хос сиэн тапталлаах эбээтэ. Кыргыдай оскуолатыгар остуораһынан,  интиринэккэ  1969 сылтан 1986 сыллаахха сабыллыар диэри поварынан, түүҥҥү ньээнньэнэн үтүө суобастаахтык үлэлээн билигин үлэ бэтэрээнэ, бочуоттаах сынньалаҥҥа олорор.

Онон, түмүктээн эттэххэ, сэрии сылын оҕолоро  аас-туор, ыарахан кэмҥэ үлэҕэ эриллэн-мускуллан, олох оскуолатыгар иитиллэн, оҕо саастара ааспыта.Кинилэринэн биһиги киэн туттабыт, махтал-баһыыба тылларын этэбит!    Этэҥҥэ ыарыыга ылларбакка чэгиэн-доруобай сылдьалларыгар алгыс тылын аныыбыт!