Павел Николаевич с женой Пелагеей Гаврильевной

Павел Николаевич Степанов Бүүлүчээн нэһилиэгин Атаҕа Суох диэн түбэтигэр 1906 сыллаахха 6 оҕолоох ыалга күн сирин көрбүтэ. Оҕо эрдэҕиттэн үлэҕэ, булт-алт кистэлэҥнэригэр уһуйуллан улааппыта. Ити киниэхэ олоҕун устата туһалаабыта, ол иһин төрөппүттэригэр махтала улахан этэ. Кэргэнэ Пелагея Гаврильевналыын бэйэлэрин оҕолорун эмиэ кыра саастарыттан үлэҕэ сыһыаран, олоххо туһалаах бары үөрүйэхтэри иҥэрэн улаатыннарбыттара. Төрөппүттэрин утумнаан, оҕолоро дьон-сэргэ хайҕалын-махталын ылар үтүө дьон буоллулар.
Павел Николаевич, Пелагея Гаврильевна Степановтар иккиэн олус хоһуун үлэһит дьон этилэр. Холхос, Сопхуос араас үлэтин үмүрүппүт аҕай дьон. Павел Николаевич Өр сылларга хонуу биригэдьииринэн үлэлээбитэ. Тын хатыытыттан им сүтүөр диэри сүүрэн-көтөн, үгүс дьону үлэҕэ аттаран туруорара, күннээҕи үлэлэрин быһан биэрэрэ, киэһэ ону хонтуруоллуура. Дойдутугар Байанайдаах булчут быһыытынан биллэрэ, оҕо эрдэҕиттэн хара тыатын иччитэ Баай Барыылаах Байанай эһэтиттэн маанылаппыт аҕай киһи.
Сэрии ыар сылларыгар дойду туһа диэн үлүмнэһэ бултаан, түүлээх бөҕөтүн туттаран, кыайыы фондатыгар улахан кылааты киллэрбитэ. Улууһугар, өрөспүүбүлүкэҕэ бастыҥ булчут быһыытынан биллибитэ, “стахановец” үрдүк аатын ылбыта, өрөспүүбүлүкэ Бочуотун дуоскатыгар тахсыбытын туоһулуур докумуон тутан үөрбүтэ.
Кини Байанайдаах булчутун, дойдубут сайдыытыгар сүҥкэн кылааты киллэрбитин “Отличник пушного промысле ЯСССР” уонна “Лучший охотник ЯСССР” бэлиэлэр, үгүс бочуотунай грамоталар, хайҕал-махтал суруктар толору туоһулууллар. Степановтар иккиэн “сир түннүгэ” дьон этилэр. Айылҕа уларыйыытын бэргэнник билгэлиир ураты дьоҕурдаахтара. Онон ордук от үлэтин саҕана дьон кинилэртэн ыйытан, сүбэлэтэн дьаhанар буолаллара.
Хойукка диэри Атаҕа Суохтарыгар олорбуттара, сылы эргиччи айан дьонун аһатан, хоннорон, эмтээн-томтоон, сүбэлээн-амалаан, көлөлөрүн кытта көрөн-истэн абырыыллара. Үгүс сэргэх сэһэннээх, баай-талым астаах-үөллээх ыал быһыытынан күн бүгүнүгэр диэри биир дойдулаахтарын сэргэх сэһэннэрэ буолаллар.

Авторы: Васильевы: С. ученица 11 класса, М. ученик 9 класса, С. ученица 7 класса.