Степанов Егор Васильевич (1933 – 2022 гг.)

Төрөөбүт сирэ: Амма улууһа,  Лээги нэһилиэгэ.

Үөрэммит сирэ: Дьокуускай куоракка суоппар, тракторист идэтигэр үөрэммитэ.

Сэрии кэмигэр Лээги нэһилиэгэр оччолорго оскуола огото улахан дьону кытта тэҥҥэ от мустаран, оҕустаран ити сылдьан холкуос туруу үлэһитэ буолан барбыта. Сайынын Лээгиттэн 3 көстөөх Дьороҕойдоох диэн Амма кытылыгар окко ат кыраапкатынан сайыны быһа от мустарара. Ити курдук үлэлии сырыттаҕына, 1956 сыллаахха техникаҕа баҕалаах, дьоҕурдаах улэһит уолу холкуоһун салалтата Дьокуускай куоракка суоппар, тракторист идэтигэр үөрэххэ ыыппыта. Үөрэҕин үчүгэйдик бүтэрэн, суоппар, тракторист идэтин ылан, үөрэн – көтөн дойдутугар эргиллибитэ. Онон нэһилиэгэр, холкуоһугар бастакы суоппар, тракторист буолар дьылҕаламмыта.

Холкуоһа ЗИС – 5 диэн эргэ автомассыынаны туттарбыта. Онон кыһынын өрүс мууһа үчүгэйдик тоҥмутун кэннэ суол таһаарынан Амматтан холкуоһугар уонна нэһилиэгин маҕаһыыныгар араас таһаҕаһы таһааран дьонун – сэргэтин үөрдэрэ. Кэлин өссө легковой массыынаны итэҕэйбиттэрэ. Иннэ гынан наада буоллаҕына ханнык баҕар массыынаҕа олороро. Сайынын «Беларусь» тракторынан сир хорутуутугар, окко үлэлээбитэ. Мас – от тиэйиитэ кинитэ суох буолбата. Быһата, Калинин аатынан холкуос биир тутаах үлэһитэ буолбута.

1964 cыллаахха сүрэҕин аҥарын, учуутал кыыһы, Вера Николаевнаны көрсөн, дьоллорун холбоон ыал буолбуттара. 1967 сыллаахха Вера Николаевна төрөөбүт дойдутугар Өнньүөскэ көһөн кэлбиттэрэ. Егор Васильевич кыһынын таһаҕас массыынатыгар суоппардаабыта, сайынын «Беларусь» тракторынан Таҥха үрэҕэр оттуур звеноҕа от оҕустарааччынан анаммыта. Кэлин кини бу звенону бэйэтэ салайар буолбута. Сыллата элбэх оту оттооннор таһаарыылаах үлэлэринэн бастыҥнар кэккэлэригэр киирэн барбыттара. Күһүнүн “Амма” сопхуос Ааллаахтааҕы биригээдэтигэр тиийэн «Киргизтан» диэн оту пресстиир преһинэн соломону пресстэтэн «Амма» сопхуос Өнньүөстээҕи отделениятыгар аҕалаллара. Бу кэмҥэ оройуоннар сопхуостар тэриллэннэр үлэ күөстүү оргуйбут кэмнэрэ этэ. Кыһыҥҥы өттүгэр Егор Васильевич аатырбыт ыанньыксыт Социалистическай Үлэ Геройа П.И.Яковлев салайар «Юбилейнай» толору механизациялаах ферматыгар ноһуом таһаарыытыгар, уокка оттор мас таһыытыгар үлэлээбитэ. Кини 1973 сыллаахха үчүгэй үлэтинэн соҕуруу Сочи куоракка Амматтан соҕотоҕун баран сынньанан, эмтэнэн кэлбитэ. Егор Васильевич Степанов 34 сыл устата илиитин араарбакка тракториһынан эҥкилэ суох үлэлээбитэ.

 

 

Автор: В.Ксенофонтов, ученик 4 класса, М.Ксенофонтова, ученица 2 класса.