Спиридонова Мария Потаповна (1920 г.р.)

Мин ийэм 1920 сыллаахха кыһын Маарымчыга Уһун Күөл уонна Төгүрүк Күөл икки ардыгар Батаап (Потап) уонна Кэчии (Намылда Кэчии) Степановтар диэн ыалга иккис оҕонон төрөөбүтэ. Аҕалара эрдэ өлөн ыас-туор тиийбэт-түгэммэт диэн тугун билэн аҥаардас ийэлэрэ иитэн улаатыннартаабыта.

Сүүрбэ сааһын ааһан отуччатыгар Илин Мукучу киһитигэр Степан Петрович Спиридоновка кэргэн тахсыбыта. Кинилэр Маарымчыттан чугас Лүксүгүн күөлүгэр олохсуйбуттара.

Кинилэр олорор өтөхтөрүнэн айан суола ааһара (Якутскай-Нам-Кэбээйи-Лүксүгүн-Бүлүү).

Онон кыһыннары-сайыннары айанньыт бөҕө ааһара. Ийэбит симиэбийэ (зимовье) үлэһитин курдук олорбута: оҕолорун, хотонун көрөн. Кыһыҥны суол аһылыннаҕына үлэтэ элбиир. Айанньыттар чэйдэрин өрүү, аттарын аһатыы, от тиэнии уонна оттор мас, иһэр муус таһыныыта. Бу соҕотох дьахтар санныгар тос курдук үлэ, хайа уонна бэйэтин оҕолоро, сүөһүтэ, хотоно. Оҕонньоро кадровай булчут этэ. Кыһынын, сайынын бултуура. Онон дьиэ үлэтэ барыта ийэбит санныгар этэ.

Колхозтааһын саҕаламмытыгар Илин Мукучуга кэргэнин төрөөбүт сиригэр көһөн кэлэн «Ленин» колхозка чилиэнинэн киирэн, ийэбит ферма үлэһитэ буолбута. Ферма асчыта уонна сүөһү көрөөччү этэ. «Оппутун ынахпытынан көлүнэн бэйэбит фермаҕа таһар этибит», — диэн кэпсиирэ.

Колхозтары бөдөҥсүтүү буолбутугар аны «Сталин» («Ленин» — Илин Мукучу, «Сталин» — Өкүчү уонна «Стаханов» — Бадьан) колхоз чилиэнэ буолбуттара. Инньэ гынан аны Сайылыкка кэлэн олохсуйбуттара. Кэлин сааһыран, ыарытыйан колхозтан уурайан балыыһаҕа санитаркалаабыта.

Ийэбит аах сэттэтэ оҕоломмуттарыттан билигин Михаил, Ин­нокентий, Евгения уонна мин баарбыт.

Биһиги ийэбитин Арыттаах, Чагда кырдьаҕас, кини саастыы дьонноро Лүксүгүн Маарыйатынан эрэ билэллэр этэ.

Ийэбит балачча кырдьан баран кырдьыы бэрээдэгинэн, мас эмэҕирэрин курдук кэбирээн, сылы кыайбат кэм суорҕан-тэллэх киһитэ буолан баран өлбүтэ. Ийэбитин хас да сыл оҕо курдук бостууктаан-бүөбэйдээн, хара өлүөр диэри көрбүт киһинэн эдьиийим Евгения Степановна буолар. Онон эдьиийбэр Евгенияҕа сүһүөхтээх бэйэбинэн сиргэ тиийэ сүгүрүйэбин, махтанабын. Кини 2002 сыллаахха сааһыары-кыһын өлбүтэ.

 

Автор: уола, Спиридонов Н. С.