Биһиги ийэбит, Соловьева Евдокия Николаевна, үлэ уонна тыыл ветерана, 1926 сыллаахха олунньу 6 күнүгэр Хаҥалас улууһун (Орджоникидзевскай оройуон) IV Малдьаҕарыгар күн сирин көрбүтэ. Таптыыр аҕата, биһиги эһэбит, Соловьев Николай Гаврильевич колхоз бэрэссэдээтэлинэн үлэлии сылдьан, сэрии саамай суостаах 1942 сыл сайыныгар фроҥҥа барбыта. Калининскай фронт 3-с охсуулаах аармыйатын 31-с стрелковай биригээдэтигэр сэриилэспитэ. Ити сыл ахсынньы ыйыгар Великие Луки куорат аттыгар элбэх хаан тохтуулаах кыргыһыы хонуутугар геройдуу охтубута. Ийэбит сэрии сылларыгар 16 сааһын туолбут кыыс сурук таһааччынан үлэлээбитэ, онон фронтан кэлбит үөрүүлээх эбэтэр хомолтолоох суруктары аан-маҥнай кини тутар уонна дьоҥҥо тиэрдэр этэ. “Почтальоннуу сылдьаммын полевой почта бэчээттээх солдатскай үс муннук суруктары элбэҕи таспытым, ол эрээри оччотооҕуга историяҕя суолталаах кэмҥэ олорорбутун өйдөөбөт этибит. Аны билигин кэлэн биир да сурук хаалбатаҕыттан хомойобун… Биһиги фронтан бааһыран төннүбүт буойуннары көрсөрбут. Өскөтүн кыһын буоллаҕына, сэлиэнньэттэн барытыттан истээх сон, этэрбэс, үтүлүк хомуйа охсон, Өлүөхүмэҕэ барааччылары Батамаайыга диэри тиэрдэн биэрэрбит”, — диэн ийэбит кэпсиирэ. Сэрии ыар сылларын этинэн-хаанынан билбитэ. ССРС Верховнай Сэбиэтин Президиумун 1945 сыллааҕы уурааҕынан “За доблестный труд в Великой Отечетственной войне 1941-1945 г.г.” мэдээлинэн, Улуу Кыайыы юбилейнай “Тридцать лет Победы в Великой Отечественной войне 1941-1945 г.г.” уонна “Сорок лет Победы в Великой Отечественной войне 1941-1945 г.г.” мэдээллэринэн наҕараадаламмыта.

Поскачина Елена Николаевна