Софронов Николай Давыдович (1905 г.р.)

 

Бу Диодоровтар диэн ыаллар үһүс уоллара. 1905 сыллаахха ахсынньы 19 күнүгэр  Амма улууһун Болугур нэһилиэгэр Диодоровтар дьиэ кэргэҥҥэ үһүс оҕонон төрөөбүтэ. Кинини кыра эрдэҕинэ оҕото суох ыал,Софронов Давид Парфенович уонна ииппит ийэтэ  Марфа Спиридоновна иитэ ылбыттар. 1929 – 1936 сылларга «Дьулуйуулаах» диэн колхуос тэриллэн онно бэрэссэдээтэлинэн үлэлээбит. 1938 -1941 сылларга хону биригэдьииринэн үлэлээбит.

1941 сыл атырдьах ыйын 13 күнүгэр эһээбит сэриигэ бэбиэскэ тутан барбыт. Забайкальскай фронт 293 с мотострелковай полкатыгар сулууспалаабыт. Моноглияттан саҕалаан  Маньчжуриянан, Порт – Артурга тиийэ барбыттар. Манна биир дойдулаахтарын Максимов Бүөтүрү, Борисов Савваны, Алексеев Иван Гаврильевиһы кытта Кыайыы күнүн ылбыттар.  1945 сыл алтынньы 27 күнүгэр демобилизацияланан баран ахсынньы ыйга дьиэтигэр кэлбит. Дойдутугар  төннөн кэлэн  араас үлэлэргэ үтүө суобастаахтык үлэлээбитэ. «За победу над Японией», 1985 сыллаахха «Аҕа дойду сэриитин» II истиэпэннээх орденынан наҕараадаламмыта.

Кини олоҕун аргыһын, кэргэнин Александра Павловна Алексееваны кытта былыргы сиэринэн оҕо эрдэхтэринэ илии тутуһуннарбыттар, Ньукулайы 10, Өлөксөөһү 9 саастарыгар. Ыал быһыытынан 1927 сыллаахтан олорбуттар.  Кинилэр өрүү бииргэ уһуннук үс уол оҕолонон дьоллоохтук олорбуттара. Сиэттэрдэнэн, хос сиэттэрин, хос хос сиэттэрин көрөн бу дойдуттан  эбээбит Өлөксөөс 1990, эһээбит 1994 сыллаахха күрэммиттэрэ.

Эһээбитин Ньукулайы ииппит хос эһээбит Софронов Давид Парфенович, (Мэппиэн) оҕонньор уһун үйэлээҕинэн биллэр, кини төрөөбүт сыла 1850 сыл, өлбүтэ 1966 сылынан суруллубут. Онтон төрөппүт аҕата Диодоров Яков Кириллович эмиэ уһун үйэлээҕинэн биллэр, кини Таатта Игидэйиттэн төрүттээх буолан «Игидэй Дьаакып» дииллэрэ үһү. Дьаакып Бологур Николаевскай таӊаратын дьиэтин (билигин Ааллаах сиригэр турбут) тутуспута диэн кэпсииллэр.

Эһээбит Софронов Николай уоттаах сэрииттэн эргиллэн эйэлээх олоҕу уһансыбытынан, эбээбит Өлөксөөс сэрии кэмигэр тыылга үлэ үгэнин көрсөн кыайыыны аҕалбыттарынан киэҥ тутта ыччаттарбытыгар кэпсиибит.

Билигин биһиги удьуорбутун үөрэтэн ыччаттарбытыгар тиэрдэр ытык иэспитин толоруохтаахпыт. Ким бэйэтин историятын билэр, киһи ол киһи инникилээх буолар.  Ийэ дойдуну көмүскээбиттэр ааттарын кэнэҕэски кэлэр көлүөнэ мэлдьи саныы, кэриэстии туруохтара.

 

Автор: Средняя общеобразовательнаяя школа № 25.