Собакина Мария Семеновна (22.04.1927 – 05.07.2000 гг.)

 

Төрөөбүт сирэ: Хадаар н. Чурапчы улууһа

Мин хос эбээм Собакина Мария Семеновна муус устар 22 күнүгэр 1927 сыллаахха Чурапчы улууһун Хадаар нэһилиэгэр төрөөбүтэ. Кини атырдьах ый 1942 сылыгар Чурапчыттан Эдьигээн улууһугар дьиэ кэргэнин кытары көһүүгэ барбыттара.  Кини оҕолор, дьахталлар буолан кытыыга сүөкээбит бэрэбинэлэрин саас уу ылбатын диэн үөһэ хатайдыыра. Дьиэ уот суох буолан үөрэммэтэхтэрэ, ол бэрэбинэ барыта үөһэ тахсыбытын кэннэ Говор диэн дэриэбинэҕэ эмиэ бэрэбинэ таһаара барбыта. Тохсунньуттан Булуҥ оройуонугар барбыта.

Кини көһүүгэ сылдьыбыт дьонун куруутун ахта – санаан ылара. Бары бэйэ-бэйэлэригэр күүс көмө буолан, үчүгэй саналаах үлэһит да дьону кытта сылдьыбыт эбиппин диирэ. Эбээлээхпин куруутун үөрэтэ, сүбэлии-амалыы, үөрэ-көтө, санааны түһэрбэккэ сылдьарга үөрэппиттэрэ.

Булуунтан биир ый буолан баран төттөрү  Говорга төннүбүттэр. Саас эр дьону балыктата ыыппыттар, өрүс эстиэн иннинэ. Оҕо дьахтар хаалан баран аччыктыы сыыспыттар этэ. Суол суох буолан нормалара сатаан кэлбэккэ. Биир ыалга хоччоҕой бурдуктаах буолан киилэлээх миискэнэн  үллэстэн, күнү быһа оргутан уутун иһэр эбиттэр. Олорор сирдэриттэн 5-6 км сиргэ 2 ураһанан эбээҥкилэр олороллор эбит, онно баран балык бөҕөнү сүгэн кэлэн тыын ылбыттар. Муус барарын кытта катерынан дьонноругар баран балыктаспыттар. Саппыкылара игин суох буолан атах сыгынньах сылдьан мууҥха быатын соһор этэ. Уочаратынан тыыга олорон мууҥха түһэрэллэрэ, онно дьэ ирэллэр эбит. Күһүн үөрэх саҕаланыар дылы мууҥхаласпыт этэ. Ийэлээх аҕата Кюсюргэ үлэлии киирбит буолан интернатка үөрэнэ киирбит эбит.

1951 сыллаахха Чурапчы педучилищетын бутэрэн Аллайыаха оройуонун Чокурдаах 7 кылаастаах оскуолатыгар учууталлыыр. Онно мин хос эһээбин көрсөн ыал буолаллар.

Мин хос эбээм 45 сыл наар алын кылаастарга учууталлаабыта. РФ норуотун үөрэҕириитин туйгуна. Үрдүк категориялаах наставник педагог. Аҕа дойдуну көмүскүүр Улуу сэрии сылларыгар балык булдугар диэн ааттаах Хоту көһөрүллүүгэ сылдьыбыта, тыыл ветерана. Сэттэ оҕо ийэтэ, 25 сиэн эбээтэ, 46 хос сиэн эбээтэ буолар.

 

 

Автор: Соловьева К., 2 класс