Собакина Прасковья Саввична (1916 — 2001), Собакин Гаврил Андреевич (1913 — 1969)

Мин хос эбэм Собакина Прасковья Саввична 1916 сыллаахха от ыйын 29 кунугэр төрөөбүт. Хос эьэм Собакин Гаврил Андреевич 1913 сыл төрүөх. Сүрэхтэринэн сөбүлэһэн 1936 сыллаахха сэтинньи 17 күнүгэр Чурапчы оройуонун Хоптоҕо нэһилиэгэр ыал буолбуттар.

1939-1942 сылларга Саха сиригэр, чуолаан өрүһэ суох, үрдүк сирдэргэ сут-кураан буолбут. От-мас үүнэн иһэн кэхтибит, алаастарга аһыҥа өрө турбут, бурдук үүммэтэх.

1942 сыллаахха тохсунньу ый 6 күнүгэр «Сибиир уонна Уһук Илиҥ өрүстэригэр балыктааһыны тэрийии» диэн ССРС уонна большевиктар коммунистическай партияларын Киин Комитетын дьаьала тахсыбыт. Улэһит илии тиийбэтинэн «Чурапчы оройуонун колхуостарыгар тэрээһин» дьаһала тахсыбыт.

Бу дьаһалга олоҕуран Чурапчы оройуонун 41 колхуоһа, 1655 хаһаайыстыба, 4988 киһи, ол иһигэр мин хос эбэм, хос эһэм икки кыра оҕолорунаан уонна аймахтарынаан хоту Кэбээйи улууһугар балыктааһыҥҥа күүс өттүнэн көһөрүллүбүттэр.

Хос эһэм балык бултааһыныгар үчүгэй үлэлээх биригэдьиир, онон үрүҥ билиэт ылан сэриигэ барбатах. Хос эбэм балык астааһыныгар сылдьыбыт. Түүннэри-күнүстэри киһилии аһаабакка, тоҥон-хатан үлэ үөһүгэр сылдьыбыттар. Илдьэ барбыт төрөппүттэрэ, чугас дьонноро, уоллаах кыыс оҕолоро хоргуйан өлөөхтөөбүттэр.

Хос эһэм Гаврил Собакин ВДНХ кыттыылааҕа, 1946 с. ССКП чилиэнэ, Сталин төбөлөөх мэтээллээх эбит. Сэрии кэнниттэн биригэдьииринэн, кладовщигынан үлэлээбит. Бэйэтин харыстаммакка үлэ бөҕөну үлэлээн, сут-кураан, аччыктааһын кэмнэрин тулуйан, доруобуйатыгар улаханнык о5ҕстаран, уһун үйэлэммэккэ 1969 с. Бэс ыйын 4 күнүгэр, баара-суоҕа 55 сааһыгар олохтон туораабыт.

Хос эбэм Боккуойа көһөрүү кэмигэр икки оҕотун сутэрэн баран, 1945 с. атырдьах ыйыгар улахан уолун төрөппүт. Ол кэнниттэн өссө 3 оҕоломмуттар.  Мин эбэм Зоя 1953 с. төрүөх, соҕотох мааны кыыстара эбит.

Хос эбэм сэрии кэнниттэн ыанньыксыттаабыт. 1957 с. ВДНХ баран кэлбит. Сталин төбөлөөх мэтээллээх, үлэ-тыыл бэтэрээнэ. Элбэх сыралаах үлэтин бочуоттаах грамоталар, мэтээллэр туоһулууллар. Кэлин ыарытыйар буолан интернакка повардаабыт, сайынын отчуттарга оһох оттон килиэп астыыр эбит. Биир да өрөбүл диэни билбэккэ үлэлиир эбитэ уһу.

Хос эбэм сиэн, хос сиэн беҕе көрсөн, улаатыннарсан, күүс-көмө буолан олорон 2001 сыллаахха Чурапчы оройуонун Дириҥ бөһүөлэгэр 85 сааһыгар олохтон туораабыт.

Ийэм кэпсииринэн эбээ Боккуойа сып сырдык, кыра, хатыҥыр эмээхсин эбитэ уһу. Хаһан да кыыһырбат, чиэһинэй, ып ыраас, асчыт бөҕө этэ диэн кэпсээччи.

Хос эбэм, эһэм төрөөбүт-үөскээбит Мэлдьэхсилэрин, Хоптоҕо нэһилиэгэ сайдарын туһугар туох баар сыраларын, күүстэрин ууран үлэлээбиттэр.

 

З. Саввина, 7 кылаас