Слепцова Нюргустана Ивановна (1928-2015 сс.)

Мин хос эбээм Слепцова Нюргустана Ивановна – тыыл, үлэ ветерана. Кини 1928 сыллаахха Дьокуускай куоракка төрөөбүтэ. Аҕа дойду сэриитэ саҕаланарыгар кини 13 эрэ саастааҕа, онон оҕо сааһа биир да өрөбүлэ суох, үлэ үөһүгэр ааспыта. Эбээбит сыралаах үлэтэ бэлиэтэнэн, «За доблестный труд в Великой Отечественной войне 1941 -1945 гг.» үбүлүөйдээх бэлиэнэн уонна мэтээлинэн наҕараадаламмыта. Хос эбээм тыыннааҕар сыл ахсын Кремыльтан Кыайыы күнүгэр эҕэрдэ сурук тутара, ону оҕолоро, сиэннэрэ үөрдэ-көтүтэ эҕэрдэ суругун ааҕан биэрэллэр эбит. Биһиги эбээбитигэр Кыайыы күнүнэн кэлбит открыткалары харыстаан, уура сылдьабыт.

Мин хос эбээм улахан дьиэ кэргэн күн күбэй ийэтэ, кини 7 оҕону төрөтөн, улаатыннаран, үөрэхтээн, үлэһит оҥорбута. Кини элбэх оҕолоох Ийэ знагынан наҕараадаламмыта. Хос эбээм Нюргустана Ивановна аҕата Слепцов Иван Алексеевич советскай, партийнай, салайар үлэҕэ үлэлээбитэ, кини Платон Алексеевич Ойуунускай бииргэ төрөөбүт кыра быраата этэ. Эбээбит аҕата уонна таайа «норуот өстөөҕө» — диэн балыырга түбэһэннэр олоҕор элбэх атаҕастабылы, ыарахаттары ааспыта, элбэх эрэйи көрсөн, үөрэҕэ суох хаалбыта. Ол кэмнэр тустарынан кини ахтыылара хаһыакка, сурунаалга бэчээттэммитэ.

Улуу Кыайыы күнүн көрсө, хос эбээм Нюргустана Ивановна Слепцова Таатта хаһыакка 2010 сыллаахха бэчээттэммит “Олох суола”- диэн ахтыытын ааҕын.

Биһиги бары тапталлаах эбээбитин ахтабыт, саныыбыт, кининэн киэн туттабыт!

 

 

Автор: С.Сентизова Сайнара, 1 «б» кл. үөрэнээччитэ.