Слепцов Николай Николаевич -II (1912-2004 гг.)

 

Мин хос эhэм Үлэ уонна Тыыл бэтэрээнэ

1912 с кулун тутар 27 күнүгэр Элгэс улууhугар (Билигин Абый улууhа) «Таала Куол» учаастагар «Даркыга» төрөөбүтэ. Кыра сааhыттан дьонун кытта cүөhү, сылгы көрүүтүгэр үлэлээбитэ. 15 сааhыттан уопсай үлэ араас салаатыттан үлэтин саҕалаабыта. 1952 сыл олунньу ыйтан ССКП чилиэнэ. «Ленин суола» холкуос биир бастыҥ «Маяк»  ударник сылгыhыта.

38 сыл сылгыhыт, совхоз араас үлэтигэр 10-ча сыл үлэ стажтаах. Үлэлээбитин устата 870-тан тахса кулуну төрөтөн, иитэн оройуон хаhаайыстыбатыгар туттарбыт. Кыhын табанан, сайын атынан 30 көстөөх сиргэ сылдьара. 1935-1957сс. сылгыларын таастар, хайалар  тэллэхтэринэн  үүрэн чыбаагыны сиэтэ таhаарара (Чыбаагы оту сиэбит сылгы эмис, сыалаах, сыата кыhыл өҥнөөх буолар)

Уhук хоту сиргэ  Абый улууhугар үлэhит тиийбэтиттэн сылгыга дьахталлары кытары үлэлэтэллэрэ. Совхозга бииргэ үлэлээбит кыыhын кытары Новикова Екатерина Ивановналыын ыал буолан,  4 оҕону күн сирин көрдөрөн, иитэллэр, үөрэттэрэллэр. Хос эhээбит Николай Николаевич  холку майгылаах, киэҥ көҕүстээх, элэккэй, кырдьаҕастыын эдэрдиин уопсай тылы булар, көрдөөх кэпсээннэрдээх, дьээбэлэрдээх этэ. Бу дьиэ кэргэн оҕо иитиитигэр улахан болҕомтону уурара, кэмчи ас-танас да кэмигэр оҕону аччыктатар, тоҥорор буолбаттара. Үлэни курук өрө туталлара, булугас- талыгас,  барыны бары сатыыр гына оҕолорун ииппиттэрэ. Улахан кыыс Раиса Николаевна доруобуйата мөлтөх буолан үөрэххэ барбатаҕа, өр сылларга Госбанна харабылынан үлэлээбитэ. Иккис кыыс Марина Николаевна, мин эбээм учуутал идэлээх, Саха Сирин үөрэҕириитин туйгуна, «Дети Азии» фонд стипендиата, Саха Сирин Президенин Гранын хаhаайката. Үhүс кыыс Мария Николаевна медик үөрэхтээх, нэhилиэк балыыhатыгар фельдшерынан үлэлээбитэ. Кыра уол Михаил Николаевич Россия художниктарын Союhун чилиэнэ, Саха Республикатын культуратын туйгуна. Слепцов Николай Николаевич Республика, улуус, нэhилиэк сылгы иитиитигэр эҥкилэ суох үлэлээбитин Абый совхоз дирекцията, профком, партком, комсомол, Саха Республикатын президенэ  М.Е. Николаев, Якутскайдааҕы партийнай Областной комитет, Саха АССР Верховнай Советын Президиума махтал суруктара, грамоталара туоhулууллар. Хос эhээбит пенсияҕа тахсан баран политехническай үөрэххэ үөрэммитэ, хаhыаты сурунаалы ааҕара, суруйара, өйүгэр бэрткэ суоттуура. Кырдьан да баран дьиэҕэ-уокка көмөтө үгүс буолара, мууhун ылара, маhын бэйэтэ эрбэтэрэ, хайытара, саhаанныыра. Кыанар оҕонньор диэн биир дойдулаахтара сөҕө көрөллөрө. «Үлэ киhини киэргэтэр» диирэ хос эhээбит. Икки инсульт кэннэ, үһүс инсультан Николай Николаевич 2004 сылга 92 сааhыгар күн сириттэн күрэммитэ.

38 сыл устата халын хаарга, чысхааннаах тымныыга, буурҕаҕа, өҥүрүк куйааска уонна харааннаах бырдахха быыстала суох сылгыга улэлээhин геройдуу эр санааны, тулууру көрдөрөр. Биhиги  хос эhээбитинэн, маннык чулуу улэhит  өбүгэлээхпитинэн  киэн туттабыт, холобур оҥостобут, кини грамоталарын, махтал суруктарын харыстыы-харайа көрөбүт.

Слепцов Николай Николаевич –II   5 сиэннээх, 12 хос сиэннээх.

 

 

Автор: Айыына Попова, 3 класс