Слепцов Христофор Афанасьевич (1922 – 2005 гг)

Слепцов Христофор Афанасьевич 1922 сыллаахха Хаҥалас нэһилиэгин Хопто сайылыгар дьадаҥы 7 оҕолоох ыалга төрөөбүт. Аҕата Слепцов Афанасий Егорович сэрии кэмигэр сэбиэт бэрэсэдээтэлинэн үлэлээбитэ, үлэ үөһүгэр сылдьыбыта.

Христофор оҕо сылдьан олох ыараханыттан, ас – таҥас тиийбэтиттэн балтын Варвараны кытта өргө дылы хаампатах. Онтон Боруулаахха уруу аймахтарыгар ииттэрэ олордубуттар. Аҕата бэйэтигэр курданан баайан атынан аҕалбыт. Ол дьыл ийэтэ өлбүт, онон Христофор эбэтигэр иитиллибит. Ыарыһах да буоллар 11 сааһыгар 1933 сыллаахха оскуолаҕа үөрэнэ киирбит. Төһө да нтернакка ылбаталлар сорох сылы көтүтэ — көтүтэ өр үөрэммит, онон 1942 сыллаахха 7-с кылааһы бүтэрэн толору оскуола үөрэҕин 20 сааһыгар ылбыт.

Онтон “Кыһыл суол” холкуоска сайынын оттоон, кыһынын мас тиэйэн, сааскытын маҕаһыын табаарын тиэйсэн үлэлээбит. 1944 сыл тыйдары аһатан кыстаабыт. Үчүгэй көрдөрүүтүн иһин эдэр сылгылары иитээччинэн 1949 сылга дылы сылгыһыттаабыт. 1949 сыл сутааһын туран сылгыны Сартаҥҥа куруҥҥа туох да ото, эбиэһэ суох сискэ илдьэн балаакканан олорон үлэлээбиттэр. Бөрө сылгыны тардара да баара. Үлэ кытаанаҕын көрсөн күн аайы сылгыларын бөрө тардыа диэн, ас – таҥас тиийбэт да буоллар, түүннэри – күнүстэри Боруулаах, Сартаҥ, Хаҥалас сылгыһыттара буолан бары маныыллара. 1950 сыллаахха саҥа холкуос бэрэссэдээтэлэ ананан кэлэн сылгыны бөрөҕө сиэппиккит диэн ыстырааптатан ааттаан холкуос сылгыһыттарын экспедиция Нэлгэҕэ ыыппыттар. Онно борокуот Сүөгэйгэ чаардаан сылгыһыттар кыстаан ындыынан таһаҕас таспыттар. Онон 1954 сылга диэри кыһынын табанан ындыы таһыытыгар, сайынын атынан дьаамсыктаан үлэлээбит.

 

1954 сыллаахха икки нэһилиэк холбоһон Боруулаах нэһилиэгэ дэммит. “Үүнүү”, “Кыһыл суол” холкуостар холбоһон Маленков аатынан бөдөмсүйбүт холкуос буолбуттар. Сохсолоох, Томтор, Токума, Мэҥэ биригээдэ буолбуттар. Христофор Афанасьевиһы Сохсолооххо биригэдьииринэн анаабыттарын сөбүлээбэккэ, кладовщиктаан баран, Чаркыга таба ыстаадатын сэбиэдиссэйинэн анатан 2 сыл үлэлээбит.

1960 с. Юмшанова Александра Герасимовналыын ыал буолбут. Барыта 6 оҕону иитэн атахтарыгар туруорбуттар.  Нэһилиэк общественнай олоҕор кыттан, дьон интэриэһин көмүскэһэн олохтоохторго ытыктанар буолбут. Төһө да ыарыйдар пенсияҕа тахсыар дылы дьону кытта тэҥҥэ ыарахан үлэни барытын үлэлэһэн сылдьыбыт. Уопуттаах сылгыһыты салайааччы быһыытынан сылгы иитиитигэр өссө уон сыл сүбэһит, наставник быһыытынан үлэлэтэн биллэр – көстөр үлэлээх сылгы ферматын тэрийтэрбиттэр. Онон холкуос, совхоз сайдыытыгар кылаатын иһин икки төгүллээн Бочуот кинигэтигэр Христофор Афанасьевич аата киирэн турар.

Христофор Афанасьевиһы үлэ бэйэтэ үөрэппитэ “Хопто” сайылыкка сылгыһыттыаҕыттан, биригэдьиирдээн киэҥник биллэр сылгы ферматын олохтоспута, профком бэрэссэдээтэлэ, нэһилиэк сэбиэтин депутата, актыыбынай общественнига, барыта 52 сыл үлэ стажтаах.

Наҕараадалара:

“Аҕа дойду Улуу сэриитигэ 1941-1945 сс.”, “Үлэҕэ килбиэнин иһин”, “Тыыл бэтэрээнэ”, “Дьааҥы улууһун бочуоттаах олохтооҕо” мэтээллэрдээх, оройуон, совхоз араас таһымнаах Бочуотунай грамоталардаах.

 

Ахтыыны суруйда Аскар Иванов, Дьокуускай куорат 25 №-дээх оскуолатын 3 «В» кылааhын үөрэнээччитэ. Кулун тутар, 2025 сыл.