Слепцов Афанасий Дмитриевич 10.02.1930г.р.

 

Саха Республикатын тыатын хаһаайыстыбатын бочуоттаах бэтэрээнэ,  В.Н. Исаков аатынан бириис  хаһаайына, Нөмүгү нэһилиэгин бочуоттаах олохтооҕо,  Хаҥалас улууһун Ытык кырдьаҕаһа, үлэ, тыыл бэтэрээнэ.

Мин хос эьээм Слепцов Афанасий Дмитриевич, 1930 сыллаахха олунньу 10 күнүгэр 1 Маалтааны Торҕонотугар Анна, Константин Широкихтар дьиэ кэргэннэригэр 4-с оҕонон күн сирин көрбүтэ, ийэтэ  эьээбин  төрөтөөт өлбүтэ.  Онон оҕолоро суох аймахтарыгар Варвара уонна Дмитрий Слепцовтарга иитиллибитэ. 1943 сыллаахха холкуостары бөдөҥсүтүүгэ “Коммунизм” уонна “Үүнүү” холкуостары Маалтааныттан Нөмүгүгэ көһөрөн киллэрбиттэрэ. Онон кинилэр  эмиэ Нөмүгүгэ көһөн киирбиттэрэ.

Эьээм  1947 сыллаахха  17 саастаа5ар  “Кэҥкэмэ” холкуоска киирэн хара үлэҕэ – мас тиэйиитигэр, Далгычыакка мас кэрдиитигэр, сайынын от үлэтигэр 1953 сыллаахха диэри үлэлээбитэ.

1953 сыллаахха I-Маалтааныга олордо5уна, военкомат  аармыйаҕа сылдьыбатах эдэр уолаттары ϴктөмнө МТС-ка  тракторист 3 ыйдаах  курсугар үөрэттэрэ ыыппыта.  Тимир көлөнү баhылыырга ϴктөмтөн Ленин уордьаннаах тырахтарыыс Алексеев Пётр үөрэппитэ. Бастаан үөрэммит тыраахтыра  ХТЗ диэн тимир колүөhэлээх, ыарахан баҕайы урууллаах, кабината суох  этэ. Кууруһун бүтэрбитин кэннэ 3 сыл МТС-ка хаалларан үлэлэппиттэрэ. Кыhынын локомобильга паровой станцияҕа үлэлээбитэ. Станциялара  75 ат күүстээҕэ. Күнүhүн МТС сварочнай, токарнай станоктара, слесарнай, кузнечнай цехтара  үлэлииллэригэр уот биэрэрэ, түүнүн мастерскойу ититэр этэ. Сайынын  Эргискэ «Сталин» колхуоска  ХТЗ  тракторынан  сир оноhуутугар,  бурдук ыhыытыгар үлэлээбитэ.   1956 сыллаахха «Ленин» колхуоска тракториhынан үлэлии кэлбит.  СТУ-7 диэн  от кэбиhэри үлэлэппитэ. Ол сыл оройуоннааҕы тыа хаһаайыстыбатын быыстапкатыгар кыттан аан бастаан 3 степеннээх Диплом ылан дьолломмута. Yлэтин үтүмэн   ситиhиитэ итинтэн саҕаламмыта. 1957 сылга ДТ-54 дизельнай  гусеничнай трактор биэрбиттэрэ. 1958 сыллаахха «ϴктөм» сопхуос тэриллэн онно үлэлии киирбитэ.

1960 сыллаахха Покровскайдааҕы ОПХ тэриллибитигэр тракториһынан үлэҕэ киирбитэ. Ол кэмҥэ ОПХ маҥнайгы директора Павлов Никандр Никифорович үлэлиирэ. 1965 сылга диэри араас бааһына үлэтигэр сылдьыбыта. 1965 сыллаахха саҥа Скрепер тракторы ылан икки сыл Суон үрэх быһытын оҥорууга, Уһун Үрүйэттэн Бэлэнтэй күөлүгэр уу түһэр ханаабатын хаһыытыгар үлэлээбитэ. Салайааччылара гидрограф-инженер үөрэхтээх Слепцов Демьян Дмитриевич этэ. Кини Суон Үрэххэ Куталаах сайылыгын аллараа өттүнэн быһыт бырайыактаан туттаран, дэриэбинэ уолбут күөллэрин толорорго сүҥкэн суолталаах үлэни оҥорбута. Элбэх күннээх сыралаах үлэлэрэ түмүктээх буолбута – дэриэбинэ иһигэр алта күөл аҕыйах хонук иһигэр быччаччы туолбуттара. Дэриэбинэ дьоно улаханнык абыраммыттара, сүөһү уулуур кыахтаммыта, хаһаайыстыбаннай наадаҕа туттуллар уу уһаайбалар аттыларыгар чугаһаабыта, оҕо-аймах сөтүөлүүр күөллэммитэ.

1967-1970 сылларга ОПХ подвалын, гараһын, ахсаана биллибэт сиилэс дьаамаларын хаһыыга үлэлээбитэ. Салгыы 1970 сылтан 1987 сылга дылы Хаар Балаҕан ходуһатыгар от механизированнай звенотун салайан үлэлэппитэ. Бары сүрдээх үлэһит дьон мустан, биир санаанан салайтаран ситиһии үктэллэммиттэрэ. Звенолара өрүү инники кирбиигэ сылдьыбыта. ОПХ-ҕа 1972 сылтан ходуһаларга араас суортаах  оттору ыһан оттууллара. От үлэтигэр эһээм звенота  республика, Союз  таһымыгар тиийэ биллибитэ. Звено бастакы тэриллибит сылыгар, 1970 сыллаахха, киһи баһыгар 101 тоннаны оттоон бастакы ситиһиилэрэ кэлбитэ, САССР Президиумун Верховнай Советын Бочуотунай Грамотатынан наҕараадаланан Хара муораҕа барар путевканы ылан бары звенонан күүлэйдээн кэлбиттэрэ. Ол кэннэ ситиһии элбэҕэ.  1970, 1976, 1984 – республика чемпионнара, 1970, 1976, 1981, 1983, 1984, 1985, 1987 сыллар.га – оройуон чемпионнара буолбуттара.  Онтон 1976 сыллаахха звенолара   “Коммунистическай үлэ коллектива”ааты ылыан ылбыта. Онтон 1984 сыллаахха “Бүтүн Союзтааҕы социалистическай күрэхтэһии кыайыылааҕа” үрдүк ааты ылбыта.

Кыайыылаахтык үлэлээбит бэлиэлэринэн  буолаллар — Бүтүн Союзтааҕы, ЯАССР Верховнай Советын Президиумун, Республикатааҕы КПСС обкомун, Республика тыатын хаһаайыстыбатын министерствотын, тыа хаһаайыстыбатын институтун, оройуон,  онтон да атын Почетнай Грамоталар, Үлэҕэ килбиэнин иһин, араас Пятилеткалар кыайыылааҕа мэтээллэрэ.

Мин хос эьээбинэн олус киэн туттабын! Кини курдук туруу улэһит буола үүнүөм! Эһээм 93 саастаа5ар дьоллоох олоҕу олорон күн сириттэн барбыта.

Автор В. Андреев, 10 кылаас үөрэнээччитэ