Сивцев Тарас Павлович (1900-1987)

Мин хос эhэм Сивцев Тарас Павлович туһунан билиһиннэриэхпин баҕарабын. 1900 с., Чурапчы оройуонун Маралаайы нэһилиэгэр төрөөбүтэ.

1942 сыллаахха сайыныгар сэриигэ ынырыллан баран    доруобуйатын туругунан сыыйыллан үлэ фронугар, масс кэрдиитигэр сылдьыбыта. Ыарыһах кэргэнин, 3 кыра оҕолорун хаалларан барбыта. 1943 сыллаахха ыалдьан дойдутугар эргиллэн кэлэр.

1928 сыллаахха Мугудай нэһилиэгэр «Төбүрүөн» ТСОЗ (Товарищество совместной обработки земли) тэриллибитэ. Мин эһэм онно ааҕар, суруйар буолан сир түҥэтигин комитетын председателинэн үлэлиир. 1931 сыллаахха Мугудай нэһилиэгэр «Сайдыы» колхоз тэриллэр. Манна олохтоох, тыллаах-өстөөх, бэлиэрдьон итэҕэлин ылбыт эдэркээн уолу колхоз уонна сэбиэт председателинэн талаллар.

Ити кэмҥэ тилэх баттаһа кэлбит кураан иэдээни оҥорон, дьон-сэргэ олоҕо огдолуйан олороохтууллара. Аас-туор олохтон, ыарахан үлэттэн хоргуйан, өлүү-сүтүү олус элбэҕэ. Нэһилиэк түөрт колхоһа күүс өттүнэн хоту көһүрүүтүгэр барбыттара. Тарас Павлович дьон итэҕэлин толорон, кими да атаҕастаабакка, үтүө суобастаахтык, төһө кыайарынан дьоҥҥо көмөлөһөн үлэлээбитэ диэн иһирэхтик-истиҥник дьоно-сэргэтэ ахталлар. Дьахталлар барахсаттар оҕолорун хоргутан өлөрүмээри бурдук куолаһын кыптыыйынан кырыйан ылаллар эбит. Онуоха Тарас Павлович үтүө санаалаах буолан: «Олох кытаатан биллибэт гына биир сиртэн буолбакка эрэ кырыйан ылыҥ», — диэн сүбэлиирэ үһү, түбэстэҕинэ оччотооҕу байыаннай балаһыанньа быһыытынан, хаайыыга барыахтаах эбит. Ити кэмҥэ киһи киһини уган биэриитэ үгүстү тахсыталыыр кэмигэр чахчы да хорсун быһыы, дьон туһугар үтүө кыһамньы дии саныыбын.

Сахалыы мындыр толкуйдаах, холку майгылаах салайааччы сэрии ороскуотун чөлүгэр түһэрии кэмигэр үгүс элбэх үлэни ыыппыта. Сааһыран баран кадровай булчут буолан ыраах улуустарынан сылдьара, кырдьан да баран халтай олорбокко атын миинэ сылдьан бааһына харабыллыыра. Кини 1987 с. өлбүтэ.

Биһиги ыччаттара, эһэбит Тарас Павлович олорбут олоҕунан, Улуу Кыайыыны уһансыбыт үлэтинэн киэн туттабыт, холобур оҥостобут, кини сырдык аата биһиги сүрэхпитигэр өрүү тыыннаах!

 

А. Ядрихинская