Сивцев Афанасий Николаевич (1910 – 1979)

Сивцев Афанасий Николаевич тохсунньу 31 күнүгэр 1910 сыллаахха Чурапчы улууһугар Уолба Нымыйа илиҥ баһыгар Тотоо диэн эһэтэ Таҥараһыт Киргиэлэй дьиэтигэр төрөөбүтэ. Аҕата Таҥараһыт Ньукулай Уу Оҕустаахха олохсуйбута. Сүөһүлээх, бурдук ыһар сирдээх 8 оҕолоох орто сэниэ ыал этилэр.

Хос эһэм Сивцев Афанасий Николаевич кыра үөрэхтээх, кыайыылаах көнө сүрүннээх үтүөкэн майгылаах үлэһит киһи этэ. Оҕолору, эдэр дьону, кырдьаҕастары кытта биир тылы булара, кэпсэтэрэ, доҕордоһоро.

Эдэр эрдэҕиттэн үрэх бастарыгар оттооһун, сүөһү кыстатыыта, сылгы аһатыытын курдук эппиэттээх үлэни киниэхэ итэҕэйэллэрэ. Ликбиэскэ ааҕарга суруйарга үөрэммитэ.

1941 сыллаахха Аҕа дойдуну көмүскүүр Улуу сэрии саҕаламмыта. Хос эһээм Афанасий Николаевич 1941 сыллаахха Ааллаах Үүҥҥэ көмүсчүттэргэ таһаҕас таһыытыгар үлэлээбитэ. 3-4 аты холбоон сыарҕаҕа эти-арыыны, таҥаһы тиэйэн Чурапчыттан Амма оройуонунан, Уус-Майанан Ааллаах Үүҥҥэ тиэрдэллэрэ.

1942 сыллааха кэргэнинээн, икки оҕолорун дьонноругар хаалларан баран, Ааллаах Үүҥҥэ иккиэн атынан таһаҕас таһыытыгар баран кыстаан кэлбиттэрэ. Көмүсчүттэр туттар тэриллэрин, бурдугу Охотскайтан Ааллаах Үүҥҥэ дылы таспыттара. Эр дьон кыһынын тоһуттар тымныыга, сайыҥҥы уот куйааска, ардаҕы, хаары аннынан, түүннэри-күнүстэри таһаллара. Суолга араас моһоллору, ыарахаттары көрсөллөрө. Аһынан быстарар да түгэннэрэ баар этэ. Кыһыннары тоҥмот үрэхтэри кэһэн, таһаҕастарын илиинэн таһан туораталлара. Түүннэри-күнүстэри кыһыҥҥы таһаҕы, ууну-хаары өтүппэт куруму этэрбэһи тигии, аһыыр аһы бэлэмнээһин дьахталларга сүктэриллэрэ.

1943 сыллаахха Аҕа дойду сэриитигэр ыҥырыллан Читинскэй уобаласка үлэ фронугар сылдьыбыта. Онно фроҥҥа таһаҕ ас тиэйиитигэр уонна Саха сириттэн барбыт көмөнү көрсөн, поездка тиэйэн тиксэрэллэрэ. Афанасий Николаевич хос эһэм 1945 сыллаахха этэҥҥэ дойдутугар эргиллэн кэлбитэ.

Сэрииттэн кэлэн баран эмиэ тутуу биир саамай ыарахан, эрбиинэн мас хайытыытыгар күн ахсын нуорматын аһара толороро.

Кини Аҕа дойду сэриитин бэтэрээнэ, мэтээллэринэн наҕаарадаламмыта.

Сэрии кэнниттэн өссө биэс оҕолонон, сэттэ оҕону атаҕар туруоран, үөрэттэрэн, үлэһит оҥортообуттара. Билигин сүүрбэ сиэн, 50 хос сиэн, 30 хос хос сиэн баар. Афанасий Николаевич 1979 сыллаахха олохтон туораабыта.

К. Борисова, 5  кылаас