Шадрина Розалия Дмитриевна

Эбэм Шадрина Розалия Дмитриевна Саккырыыр оройуонун /билигин Эбээн-Бытантай национальнай улууһа/ Түгэһиир нэһилиэгэр табаһыт  дьиэ кэргэнигэр төрөөбүт, сэрии ыар сылларыгар чуум үлэһитинэн үлэлээбит. Эбээм ахтыытыттан быһа тардан биир түгэни кэпсээтэххэ: кини оскуолаҕа үөрэнэ сылдьан сайыны быһа оччолорго маһы илии эрбиитинэн эрбээн, сүгэннэн хайытан саһаан туруорбуттар, хас биирдии үөрэнээччигэ уокка оттор маһы саһааннааһыҥҥа нуорма биэрэллэр эбит, ону уһун сайыны быһа үлэлээн, саһаанын туттаран күһүн оскуола аһыллыытыгар хаатыҥканнан /аҕыйах оҕоҕо биэрбиттэр/бириэмийэлэммитин туһунан үөрэ-көтө кэпсиирэ. Сэттэ кылааастаах оскуоланы ситиһиилээхтик уөрэнэн бүтэрэн Дьокуускайдааҕы культурнай-сырдатар училищеҕа библиотекарь идэтигэр үөрэнэ киирэр, мөлтөх доруобуйалаах буолан ыалдьан уһуннук балыыһаҕа сытан эмтэнэн,  үтүөрэн дойдутугар төннөн кэлэн пенсияҕа тахсыар диэри Верхоянскай оройуон Баатаҕай-Алыытынааҕы сибээс отделениетыгар үтүө суобастаахтык үлэлээн, үлэтигэр үрдүк ситиһиилэри көрдөрөн социалистическай үлэ хас да төгүллээх кыайыылааҕа знактарынан наҕараадаламмыт. Кини хотугу аҕыйах ахсааннаах норуоттар дьахталларга аан бастакы сүлүөттэрин кыттыылааҕа. Эһээлээх эбээм иккиэн үлэҕэ үрдүк ситиһиилэрин иһин оройуоннааҕы, өрөспүүбүлүкэтээҕи кыайыылаахтар сүлүөттэрин кыттыылаахтара.

Кинилэр чөл олоҕу тутуспут, нэһилиэк биир тарбахха баттанар дьоһун мааны ыала  этилэрэ. 4 оҕону үөрэхтээх, үлэһит үтүөтэ гына ииппиттэрэ.

Дьоллоох, уйгулаах олох иһин турууласпыт, Кыайыыны уһансыбыт ытык дьоммут үтүө ааттарыгар оҕолоро, сиэннэрэ, хос сиэннэрэ махтанабыт, киэҥ туттабыт, сүгүрүйэбит.

Ким да умнуллубат, туох да умнуллубат!

Автор: Томский Г., 9 кылаас