Сергучева Дария Афанасьевна

Мин хос эбээм, Сергучева Дария Афанасьевна, Чурапчы оройуонун Чыаппара бөһʏөлэгин олохтооҕо этэ. Кини Аҕа дойду Улуу сэриитэ саҕаланарыгар 18-таах эдэркээн кыыс эбит. Yлэлиир — хамсыыр, эдэр — сэнэх колхозтаахтар бары сэриигэ ыҥырыллан барбыттар. Ол иһин эдэркээн кыргыттар колхоз ыарахан ʏлэтин, эр дьоннор ʏлэлиир ʏлэлэригэр туруммуттара.

Сылгыһыттыыр киҺи суох буолан, кыҺын тымныыга сылгы көрөр ʏлэҕэ ананан ʏлэлии сылдьыбыттаах. Бу эр дьон эрэ ʏлэлиир ʏлэтин, кыайыгас кыыс диэннэр, 18-19 саастаах Дарияны итэҕэйэн ʏлэлэппиттэр.

Кыайыы буолбутун эмиэ ʏлэлии сылдьан истибиттэр. Сонуокка бурдук ыҺа сырыттахтарына аттаах киһи: «Кыайыы! Кыайыы! Кыайыы буолбут!», диэн хаһыы бөҕө буолбут. Ол кʏн улахан ʏөрʏʏ буолан, дэриэбинэҕэ мустан ырыа-тойук бөҕө буолбута ʏһʏ.

Сыралаах ʏлэтэ таах хаалбатаҕа. Ол курдук эбээм Сталин мэтээлинэн наҕараадаламмыта. Наҕараадатыгар эбии тимир бааҥкалаах пшено курууппа уонна метровай таҥас биэрбиттэр. Ол тимир бааҥка билигин да эбээм олорбут дьиэтигэр өйдөбʏнньʏк буолан турар.

Эбээм ол курдук колхозка от тиэйэрэ, балбаах таһара, мас кэрдэрэ, сааһын сир хорутуутугар, бурдук ыҺыытыгар, сайынын от ʏлэтигэр барытыгар тутаах ʏлэһит буолбута. «Эдэр, доруобай буоламмын ол кытаанах сыллары тулуйбутум» — диэн оҕолоругар кэпсиирэ. Биир саастыылаахтарыттан элбэх атаһа — доҕоро ким хоргуйан, ким Чурапчы көһөрʏʏтʏгэр баран суорума суолламмыттара.

Автор: Хос сиэнэ Д.Акимова.