Сергеева Анна Львовна

Сергеева Анна Львовна

Сергеева Анна Львовна » Күүрээннээх үлэ дьон- норуот туһугар»

Ийэм, Анна Львовна Сергеева-Чурапчы оройуонун Соловьев нэһилиэгин Бочуоттаах олохтооҕо, ыччат наставнига, Коммунистическай үлэ ударнига, Үлэ, Тыыл Ветерана, » Герой Ийэ «(1973 с.), улахан дьиэ кэргэн күн күбэй ийэтэ, эйэҕэс эбэтэ.

Ийэм, кыра сааһыттан тулаайах хаалан оҕо саас ыар кэмнэрин, сэрии ынырык сылларын этинэн-хаанынан билэн улааппыта. Ол да буоллар, бэйэтин олус кыанара. Оччолорго «Тэйэр Хайа» тэллэҕэр олороллоро, күҥҥэ хас да төгүл хайаҕа сүүрэн тахсан ынахтарын хомуйан киллэрэрин, түргэн- тарҕан туттунуутун, үөрэ-көтө кэпсээн-ипсээн, ыллаан-туойан сэһэргэһэрин, сөҕө көрөрбүт дииллэрэ, кырдьаҕастар. Сытыы-хотуу, үлэни кыайыгас, ылыннарыылаах тыллаах-өстөөх  кыыһы фермаҕа ыанньыксытынан аныыллар. Сүүрбэттэн тахса ынах сүөһүнү эт илиитинэн ыан, көрөн-истэн, үлэлээн-хамсаан, уон оҕону төрөтөн, иитэрин-такайарын быыһыгар, тыа хаһаайыстыбата сайдарын туһугар үрдүк өҥөлөөх.

1973 сыллаахха Соловьёв отделениета кыстыкка ылыммыт социалистическай эбэһээтилистибэтин толоруутун иһин ССРС тыатын хаһаайыстыбатын, Профсоюз Киин Кэмитиэтин Президиумун Бочуотунай Грамотатын ылбыта. Итиннэ, ийэм, Анна Львовна, » Үлэҕэ туйгунун иһин», » Үлэҕэ килбиэнин иһин» мэтээллэринэн наҕараадаламмыта.

1976 сыллаахха Мырылаттан аан бастакынан «Н. Д. Субуруускай» аатынан совхозка биир фуражнай ыанар ынахтан 2000 кг. үүтү ыабыта, бу оччолорго, саамай үрдүк көрдөрүү этэ.

Ийэм, 1981 сыллаахха ыччаттары салайар «Сардаҥа» фермата биир фуражнай ынахтан 2040 кг. үүтү ыабыттара, совхоз «Бочуотунай кинигэтигэр» киирэри ситиспиттэрэ, «Н. Д. Субуруускай» аатынан бириэмийэни ылбыттара. Ийэм салайар коллектива «Коммунистическай үлэ ударнига» диэн үрдүк ааты ферма үрдүнэн сүкпүтэ, бэйэтэ, ол быдан инниттэн, «Коммунистическай үлэ ударнига» этэ.

Чурапчы оройуонун Хатылы орто оскуолатын бүтэрээччилэр, оччотооҕу партия ыҥырыытынан, Мырыла историятыгар аан бастакынан, тутуспутунан фермаҕа үлэлии тахсыбыттара. Биллэн турар, урут маннык үлэни билбэтэх ыччаты салайыы үрдүк эппиэттээҕэ.Оҕолор уопсай дьиэлэргэ олорон, бэйэлэрин көрүнэн, саҥа үлэҕэ туран-олорон, сынньалаҥнарын тэринэллэригэр, ийэм, тутаах киһи этэ. Хас сарсыарда ыамҥа сөп кэмҥэ тиийэллэрин иһин, уһугуннартыыра. Ас астаатахпытына оҕолорго хайаан да улахан иһитинэн илтэрэрэ. Ол курдук, сыыйа-баайа, оҕолор аҕыйах кэм иһигэр улахан опыттаах үлэһиттэр буолбуттара. Биэдэрэлэрин тоҥолохторугар иилинэн ыллыы-туойа сылдьан үлэни баһылаан, былааны толоруу, ситиһии үөрүүтүн билбиттэрэ. Дьэ ити курдук, үгүс ыччат производствоҕа иитиллэн, үөрэххэ киирэн үөрэнэн, үчүгэй үлэһит дьон, бэйэлэрэ салайааччы буолбуттарын билэбин. Мэлдь кэлэ-бара махталларын тиэрдээччилэр.

Ийэм салайбыт » Сардаҥа» фермата куруук инники күөҥҥэ сылдьан, үс төгүллээх социалистическай үлэ кыайыылааҕынан буолбуттара.

Ийэм, Анна Львовна — үгүс сылларга дьахтар комитетын чилиэнинэн, уус-уран самодеятельность активнай солбуллубат кыттыылааҕа, Саха сирин дьахталларын 8-с, 9-с съезд кыттыылааҕа, өр сылларга хас да нэһилиэк депутата, норуодунай суут сэтээтэлэ.

Ийэм, Анна Львовна, орто дойдуга олорбут олоҕо дьылҕа хаан ыйааҕынан биир саха дьахтарын көнө-үтүө сүрэҕин, сымнаҕас, сайаҕас майгытын, тулуурун, дьулуурун туоһута буолар.

Ийэбит килбиэннээх үлэтэ оччотооҕу Партия уобаластааҕы комитетыттан, Саха АССР Верховнай Советыттан, Партия, Райсовет оройуоннааҕы комитеттарыттан үгүс элбэх эҕэрдэлэринэн, махтал суруктарынан, Бочуоттаах Грамоталарынан наҕараадаламмыта, биһиэхэ, сүдү холобур буолар.

Автор: кыыһа — Ильина А.А.