Сергеева Анна Федоровна (1930 г.р.)

 

Сергеева Анна Федоровна 1930 сыллаахха олунньу 1 кунугэр Сухаанаҕа төрөөбүтэ. Өлөөн орто оскуолатын бүтэрэн, холкуос араас үлэтигэр сылдьыбыта.  Таһаарыылаах үлэтэ үрдүктүк сыаналанан СССР Верховнай Сэбиэтин Президиумун мэтээлинэн наҕараадаламмыта, Россия «Славные сыны и дочери» диэн энциклопедиятыгар киирбитэ. Үлэ, тыыл ветерана. Кирбэй нэһилиэгин, Өлөөн улууһун бочуоттаах олохтооҕо, норуот маастара. Кирбэй нэһилиэгин, Өлөөн оройуонун народнай депутаттарын сэбиэтин депутатынан талыллан үлэлээбитэ.

1986 с. Саха сирин дьахталларын съезтэрин делегата. Кини оҕо эрдэҕиттэн сэрии сут дьылларын, ыар тыынын тулуйбут, ыарахан үлэҕэ эриллэн улааппыт буолан — эйэлээх олоҕу, үлэлиир, үөрэнэр усулуобуйаны олус сыаналыыра. Онно үрдүк суолтаны биэрэн, алта төрөппүт оҕолорун иитэн, улэһит -ыал оҥортоон уонна сиэннэрин, хос сиэннэрин, хос-хос сиэннэрин иитиитигэр, үөрэнэллэригэр көмөлөһөн кэллэ.

Аҕа дойду Улуу сэриитэ саҕаланарыгар уончалаах кыысчаан этэ. «Сут сылларыгар оҕо түргэнник улаатар» диэн аҕам саастаах дьон сөпкө даҕаны этэллэр эбит. Кып-кыра кыыс бэйэтин харыстаммакка, улахан дьону кытта тэбис -тэҥҥэ холкуос туох баар үлэтин барытын толороро. Бэл диэтэр, күһүҥҥү тымныыга муҥхаһыт оҕонньотторго иһит тутааччынан биэрэк тоҥ тааһын устун атах сыгынньах сүүрэлээн сөхтөрөрө. Эбээбитин «Тимир атахтаах кыыс» диэн ааттыыллар эбит. Эбээм оскуолаҕа үөрэнэ сылдьан медик идэтин баһылыан баҕарар эбит. Оччотооҕу сэрии сылларыгар оҕо баҕатынан буолар кыах суоҕа. Кэлин оскуоланы бүтэрэн баран, холкуоска төрөппүттэрин кытта түүлээх булдугар, таба иитиитигэр харса суох үлэлээн саҕалаабыта.

Билигин эбээбит бу ыйга 95 саастаах юбилейын ылаары долгуйа сылдьар. Биһиги эмиэ эбээбит үтүө холобурун,кытаанах санаатын бэйэбит олохпутугар сырдык сулус оҥостон, инники диэки хардыылыыбыт.

 

 

 

 

Автор: С.Тимур 6 «в» кылаас үөрэнээччитэ