Семенов Тимофей Иванович (1920-1996 гг.)

 

Мин эһээм Семенов Тимофей Иванович 1920 с. Амма улууһун Покровка сэл. төрөөбүтэ.

1943 сыллаахха Харьков куораты немецтэртэн босхолооһун сэриитигэр атаҕар улаханнык бааһыран госпиталга киирбитэ. Госпиталга эмтэнэн икки баттыгынан тайанан хаамар буолбута эрээри ыарыыта ааһан биэрбэтэҕэ, ыарыытыттан өрүттүбэккэ, эмтии сатаан баран кыайбакка, дойдутугар ыыппыттара. Эһээм уһун айаҥҥа бэрт эрэйинэн Амматыгар кэлбитэ, дойдутугар Хоомолдьуга сатаан тиийэр кыаҕа суоҕун көрөн Аммаҕа балыыһаҕа киллэрбиттэрэ. Балыыһаҕа быраас, медсестралар эмтээн көрбүттэр, эһээм туруга олох мөлтөөбүт, өлөр турукка киирбитигэр туспа хоско сытыарбыттар.

Эһээм Тимофей Иванович ийэтэ Матрена Павловна ону истэн Хоомолдьуттан атынан, хатыҥынан оҥоһуллубут волокушаҕа сэрэнэн сытыаран дойдутугар Хоомолдьуга таһаарар. Эбээбит Матрена Павловна бииргэ төрөөбүт убайа Петров Федор Павлович сахаҕа улахан отоһутунан, эмчитинэн биллибит киһи эбит. Кини Тимофейы үчүгэйдик көрөн-истэн, баастарын ириҥэтин, чэркэҕин оборон ылан ыраастыыр, эмтиир.Онтон эһээбит бэттэх кэлэр, үтүөрэр, тайаҕынан тирэнэн хаамар. Таайа Федор Павлович сүбэтинэн отоһут идэтигэр үөрэнэр, уһуйуллар. Аммаҕа холкуос биэлсэрдэрин бэлэмниир курска үөрэнэр уонна Буденнай холкуос медицинскай пуунугар сэбиэдиссэйинэн, биэлсэринэн 1945-1947 сылларга үлэлиир, таайыгар отоһут араас мындыр үөрэҕин баһылыыр.

 

 

Автор: А.Дьячковский, ученик 8 класса.