Семенов Афанасий Гаврильевич (1934 г.р.)

 

(РСФСР ойуурун хаһаайыстыбатын туйгуна, Саха сирин ойуурун хаһаайыстыбатын бочуоттаах бэтэрээнэ)

Семенов Афанасий Гаврильевич 1934 сыллаахха Ньурба оройуонун I Хаҥалас нэһилиэгин Ойбон Эбэ диэн алааһыгар күн сирин көрбүт. Кини Хаҥалас биир бөдөҥ Сыбылыктар аҕа уустарын сыдьаана буолар.

Хомойуох иһин, төрөппүттэрэ утуу-субуу өлөннөр 1943 сыллаахха биһиги аҕабыт балтынаан төгүрүк тулаайах хаалбыттар. Аҕа дойду Улуу сэриитин сылларыгар аҕабыт Куочай, Араҥастаах детдомнарыгар, онтон I Хаҥалас, Өҥөлдьө интернаттарыгар иитиллэн, киһи-хара буолбута. Сэрии кэмигэр интернат оҕолоро бурдук хомуйуутугар үлэлээн, кыайыыга бэйэлэрин кылааттарын киллэрбиттэрэ. Ол

Сэрии кэнниттэн кини төрөөбүт Хаҥалаһыттан оҕо сааһыгар тэйэн, Антоновка нэһилиэгин олохтооҕо буолбута.

Оҕо сааһыттан айылҕаҕа сөбүлээн сылдьар эдэр киһи 1957 сыл бэс ыйын 5 күнүгэр Ньурба лесхоһугар леснигинэн үлэлии киирбитэ, 1971 сылтан Антоновка учаастагар техниктээбитэ. 1989 сыллаахха бочуоттаах сынньалаҥҥа тахсыар диэри Афанасий Гаврильевич айылҕа харыстабылын курдук үтүө дьыалаҕа олоҕун анаабыта.

30-тан тахса сыл кини ханна да халбарыйбакка биир учаастакка – Бэс Чагдаҕа –  үрдүк таһаарыылаахтык үлэлээбитэ. Кини көрөр-харайар учаастага Биллээх үрэҕиттэн Бээкимдэҕэ диэри сүүһүнэн тыьыынчанан гектардаах сири тайыыр этэ.  Лесник үлэтэ үгүс түбүктээх уонна сыралаах буоларын биһиги оҕо эрдэхпититтэн билэ-көрө улааппыппыт.

Афанасий Гаврильевич бэйэтин сүрүн үлэтин таһынан общественнай үлэҕэ актыыбынайдык кыттара. Ол курдук кини Ньурба лесхоһугар өр сылларга профсоюз месткомун председателинэн үлэлээбитэ. Саха АССР ойуурун уонна кумааҕы промышленноһын үлэһиттэрин профсоюһун обкомун чилиэнэ этэ.

Афанасий Гаврильевич биир дьоһун уонна киэн тутта кэпсэнэр дьыалатынан Антоновка оскуолатыгар лесничество тэрийиитэ буолар. Аан бастаан 1972 сыл кулун тутар ыйыгар кини 15 чилиэннээх эдэр лесниктэр куруһуоктарын тэрийбитэ. Бу олус көдьүүстээх дьыалаҕа 7-9 кылаас үөрэнээччилэрэ баҕа өттүлэринэн киирбиттэрэ, кинилэр ахсааннара 70-чаҕа тиийэ сылдьыбыта.

Ити курдук оскуолатааҕы лесничествоны тэрийии оҕо иитиитигэр, чуолаан айылҕаҕа тапталы иҥэрэргэ, өйө-санаата сайдарыгар, билиитигэр-көрүүтүгэр, инникигэ дьулуурдаах, тулуурдаах буоларыгар олус улахан суолталаах этэ.

 

 

Автор: Д.Андросова, 3 в кылаас