Тимофеев Семен Николаевич — Сыччыкы Сэмэн 1914 с

Мин ийэм өттүнэн эбэм аҕата (хос эһэм) Тимофеев Семен Николаевич — Сыччыкы Сэмэн 1914 сыллаахха балаҕан ыйын 14 күнүгэр Ньурба оройуонун Малдьаҕар нэһилиэгин Мохулу Эбэ кытыытыгар тоҕус оҕолоох ыалга иккис оҕонон күн сирин көрбүт.

Аҕа дойду Улуу сэриитигэр 1943 сыллаахха Армияҕа бэбиэскэ тутан ыҥырыллыбыт. 67-с запасной стрелковай полкаҕа сулууспалаабыт. 1945 сылга Японияны утары сэрии кыттыылааҕа, Порт Артурга тиийэ сылдьыбыт, 1946 сыллаахха дойдутугар тыыннаах эргиллибит. Сталин илии баттааһыннаах махтал суруктаах, «Японияны кыайыы иһин», «1941-1945 сс. Аҕа дойду сэриитигэр килбиэннээх үлэтин иһин» медаллардаах кэлбит. Мохулуттан уон киһи уоттаах сэриигэ барбыттара бары тыыннаах эргиллэн кэлбиттэр.

Дойдутугар кэлээт, колхоз үлэтигэр рабочайынан, биригэдьииринэн үлэлээбит, кэлин пенсияҕа тахсыар диэри эргиэҥҥэ атыыһытынан үтүө суобастаахтык үлэлээн, дьон-сэргэ махталын ылбыт.

Хос эһэм Семен Николаевич Тимофеев — Сыччыкы Сэмэн Саха сиригэр биллэр оһуокайдьыт, тойуксут, кылыһахтаах куоластаах этээччи буолан биллибит.

Клара Максимовна, Зинаида Максимовна Монастыревалар

Мин хос эбээм, үлэ, тыыл бэтэрээнэ, Монастырева Зинаида Максимовна 1932 сыллаахха тохсунньу 10 күнүгэр Чурапчы оройуонун Болтоҥо нэhилиэгин Кындал учаастагар төрөөбүт.

Чурапчы оройуонун 1942 сыллаахха атырдьах ыйыгар 41 колхозтарын күүс өттүнэн хоту Кэбээйигэ, Булуҥҥа, Эдьигээҥҥэ сэрии фронугар балык соҕотуопкатыгар үлэлэтэ ыыппыттара. Хос эбэлэрим Клара 18, Зинаида 10, бырааттара Спиридон 2 саастаах этилэр.

Бэстээххэ диэри сүөhүлэрин үүрэн, аара кураанах дьиэлэргэ хоно-хоно Бэстээҕи нэдиэлэнэн булбуттар. Аны борокуоттара кэлэн биэрбэккэ уонтан тахса хонук Бэстээх биэрэгэр аhаҕас халлаан анныгар хоммуттар. Кэбээйигэ Хатырык Хомо диэн туох да дьиэтэ-уота суох сиргэ сүөкээбиттэр, Мукучу диэн сиргэ көhөн кэлэн, хотон курдук кыра дьиэ туттан хас да ыал дьукаахтаhан олорбуттар. Аҕата от-мас тиэйиитигэр, ийэтэ ыанньыксытынан үлэлээбиттэр. Көhөрүүгэ тымныйыыттан, аччыктааhынтан аҕата, үгүс чугас дьонноро, аймахтара Кэбээйигэ көмүс уҥуохтара хаалбыта. Эдьиийэ Клара муҥхаҕа сылдьан тымныйан, тыҥатынан ыалдьан, эдэр сааhыгар 1959 сыллаахха өлбүтэ. Зинаида Максимовна кыра сааhыгар тулаайах хаалбыт эдьиийин Клара уолун, мин эhэбин, Валерий Максимовиhы ийэлии иитэн, үөрэттэрэн, ыал, үлэhит оҥорбут.

Эбэм Зинаида Максимовна Чурапчытааҕы үүт заводугар 30 сыл үлэлээбит кэмнэригэр дьахтар комитетыгар, профсоюзка председателинэн, партийнай тэрилтэ секретэринэн уhуннук, үтүө суобастаахтык үлэлээбит.

 

 

Авторы: Д.Коркина, Н.Гермогенова 5в кыл