Попова Варвара Ивановна (1918 г.р.)

Хос эбээм Варвара Ивановна 1918 с. Чурапчы улууһун Алаҕар нэһилиэгэр төрөөбүтэ.

1935 с. Алаҕар оскуолатыгар бэһис кылааһы бүтэрбит.

1936-39 сс. Жданов аатынан колхозка үлэлээбитэ.

1939-41 сс. Алаҕар сельскэй сэбиэтигэр солбуйааччы председателинэн, 1941-42 сс. Алаҕар сельпотун солбуйар председателинэн үлэлээбитэ.

Мин хос эбэм Чурапчы улууһун Алаҕар нэһилиэгин төрүт олохтооҕо, хоту көһөрүллүү кыттыылааҕа.

Хос эбэм Варвара Ивановна көһүүгэ тиийэн Кэбээйи сэттэ кылаастаах оскуолатыгар интернакка 1942-44 сылларга сэбиэдиссэйдээбит. Колхозтарын дьонун кытта араас үлэҕэ-хамнаска тэҥҥэ сылдьыбыта.

Ол да иһин Варвара Ивановна 1947 сыллаахха ССРС Үрдүкү Сэбиэтин Президиумун ыйааҕынан “Аҕа дойдуну көмүскүүр Улуу сэрии 1941-45 сс. килбиэннээх үлэтин иһин” мэтээлинэн наҕараадаламмыта.

Көһүүттэн кэлэн баран балтараа сыл устатыгар Чурапчы райсоветыгар уопсай отделга үлэлээбитэ. Онтон төттөрү Алаҕарга кэлэн Жданов аатынан колхозка ферма сэбиэдиссэйинэн, сүөһү иитиитигэр, Алаҕар сельпотугар продавеһынан, врачебнай учаастакка, кэлин интернакка поварынан үлэлиир. 1964-72 сс. Бахсы сельпотугар продавецтыыр, онтон пенсияҕа тахсыар диэри Алаҕар орто оскуолатыгар буфетчицалыыр.

Варвара, Гаврил улахан уоллара Иванныын

Сэрии, көһөрүллүү сылларын этэҥҥэ туораан, эйэлээх олох эргийэн, 1950 сыллаахха Варвара Ивановна олоҕун аргыһынаан Гаврил Афанасьевичтыын олохторун холбоон ыал буолбуттара, оҕо-уруу төрөтөн таптыыр Лампаарыкыларыгар, кэлин Чыаппара бөһүөлэгин дьоһун ыаллара буолбуттара.

Биһиги чугас дьоммут оччотооҕу кэм араас кыһалҕата кыһарыйан, иккиэн да эдэр саастарыттан үлэҕэ эриллибиттэрэ, колхоз бары үлэтигэр сыстаҕастара. Өр сылларга эҥкилэ суох эппиэтинэстээхтик, таһаарыылаахтык үлэлээбиттэрин, общественнай олоххо көхтөөх кыттыыларын араас бочуоттаах грамоталар, махтал суруктар туоһулууллар.

 

 

Автор: хос сиэнэ —  Попов И., 4  кылаас үөрэнээччитэ