Попов Иван Дмитриевич

Попов Василий Дмитриевич

 

Бэлэпчикэгэ оттуур ходуһалаах, Кумааһы хоту атаҕын үрдүгэр балаҕаннаах Митэрэкээп Попов оҕонньор икки уоллаах этэ – Иван, Василий 1927 сыллаах хаһаайыстыбыннай испиэһэккэ Иван 1901 сыллаахха сэтинньи 5 күнүгэр, оттон Василий 1905 сыллаахха ахсынньы 4 күнүгэр төрөөбүттэрэ диэн бэлиэтэммиттэр. Колхозтааһын саҕана Кыһыл сис колхозка чилиэн буолбуттара. Иван сэрии иннинэ Петров Василий Прокопьевич — Матаҕа кыыһын Мария Васильевнаны кэргэн ылбыта. Мария колхозка ферма сэбиэдиссэйэ, бастыҥ ыанньыксыт буолбута. Үлэлээн-хамсаан, оҕо-уруу төрөтөн дьоһуннаахтык олорон эрдэхтэрэ уот сэрии, сут-кураан саҕаламмыта. Иваны сэриигэ ыҥырбыттара, оттон Мария Васильевна оҕолорун илдьэ Кэбээйигэ көһүүгэ барбыта. Иван арҕаа сэриигэ барбакка бэттэх үлэ фронугар сылдьан баран, көһүүлэр Намҥа Маймаҕаҕа кэлиилэрин саҕана дьонун көрдөөн булан ылбыт уонна 1956 сыллаахха диэри Намҥа колхозка үлэлиир. 1956 сыллаахха Чурапчыга төннөн кэлэннэр Төлөйгө колхозка киирэллэр. Сотору буолаат кэргэнэ Мария Васильевна ыалдьан өлбүтэ.

Иван бэйэтэ хараҕа мөлтөөн сыыйа хараҕа суох буолта уонна аҕыйах сыл буолаат эмиэ өлбүтэ. Иван Дмитриевич үс оҕолоох – икки кыыс, биир уол. Улахан кыыһа Татьяна Ивановна Төлөйгө эргэ тахсан олохсуйбута 6-7 оҕоломмут буолуохтаах. 1990 сыллар диэки Төлөйгө биир бастакытын Иванушка диэн бааһынай хаһаайыстыбатын тэринэн сүрдээх үчүгэйдик үлэлиир этэ.

Иккис кыыһа Евдокия Ивановна Дьокуускай куоракка олорор, Саха театрыгар үлэлиир, үс оҕолоох.

Уола Егор Иванович Хаҥалас улууһугар Покровскайга олорор.

Василий Дмитриевич 1943 сыллаахха ыам ыйын 24 күнүгэр сэриигэ ыҥырыллан барбыта. Ханна тиийэн, хайдах сэриилэспитин, хайа чааска сылдьыбытын туһунан туох да матырыйаал көстүбэтэ. Сэрииттэн Кыһыл сулус орденнаах эргиллибит. Бастаан Мэлдьэхсигэ олоро сылдьыбыт, бааһырбыт этэ, илиитэ такыр, сүрдээх маанытык ыраастык тутта-хапта сылдьар киһи этэ диэн Афанасий Дмитриевич Аммосов ахтар. Онтон Мэҥэ-Хаҥаласка, Баатарана көһөн хаалбыт, эргиэн систематыгар үлэлээбит. Сулумах сылдьан Баатараҕа өлбүт.

Онон билигин Миитэрэкээп Попов удьуорун Иван Дмитриевич оҕолоро, сиэттэрэ салгыыллар.

 

 

Автор: К.Прокопьева, ученица 2 класса.