Попов Федот Егорович с женой Марфой Степановной

Попов Федот Егорович 1919 сыллаахха тохсунньу 21 күнүгэр Чурапчы улууһун Хатылы нэһилиэгэр төрөөбүтэ.

Ийэтэ эрдэ өлөн, аҥардас аҕаҕа биэс оҕо хаалбыттара. «Кыһыл Аармыйа» холкуос иһинэн арыллыбыт оскуолаҕа 7-с кылааска диэри үөрэммитэ.

Оскуола кэнниттэн «Кыһыл ыллык» холкуоска киирэн, күүстээх улэҕэ эриллэн барбыта. Онно кини кыладыапсыгынан үлэлээбитэ, холкуос туох баар сүөһүтүн, үбүн-аһын аахсан, государствоҕа туттарар этэ.

1942 сыллаахха аҕата, бииргэ төрөөбүттэрэ күүс өттүнэн көһөрүллэн Булун оройуонугар барбыттара. Онтон Федот Егорович Болтоҥо нэһилиэгэр сэбиэт сэкэритээринэн үлэлии сылдьан, 1943 сыллаахха бэбиэскэ тутан Аҕа дойду Улуу сэриитигэр Ийэ дойдутун көмүскүү барбыта.

Сэриигэ илиҥҥи фроҥҥа кыттыбыта. Оччолорго Япония милитаристарын кытта кытаанах балаһыанньа тыҥаан турар кэмэ этэ. Хаһан баҕар эмискэ сэрии саҕаланыан сөбө. Даурия станциятыгар 210-с дивизия стрелковай полкатын 82-с минометнай ротатыгар сулууспалаабыта. Сэбиэскэй Сойуус Япония милитаристарын кытта сэриигэ 1945 сыллаахха атырдьах ыйын 9 күнүгэр киирбитэ. Уустук суоллаах, эриирдээх-мускуурдаах айаны айаннаан, Хайлар, Харбин куораттары ааһан, Хинган хайатын туораан, Чанчунь куоракка тиийэн сэриини түмүктээбитэ. Алтынньы ый ортото 1500 дьоппуон билиэннэйдэрин Сойууска поеһынан харабыллаан аҕалбыттара. Итинтэн салгыы Забайкаловскай фроҥҥа сулууспалаан баран, 1946 сыллаахха демобилизацияланан дойдутугар төннүбүтэ.

Аармыйаттан кэлээт да, «Кыһыл ыллык» холхуоска салгыы улэлээн барбыта. Ол курдук кыладыапсыгынан, кэлин хонуу үлэһитинэн үлэлээбитэ.

Субуруускай аатынан холкуос (кэлин сопхуос) Хатылы отделениятыгар 1988 сыллаахха  (үлэтин ыстааһа 49 сыл 11 ый) диэри, харыс да сири халбарыйбакка араас үлэҕэ улэлээбитэ. Элбэх махтал сурук, Бочуотунай грамоталардаах.

«Орден Отечественной Войны II степени», «1941-1945 сс. Улуу сэриигэ Германияны кыайыы иһин» Сталин мэтээлинэн, «Японияны утары кыргыһыыга кыайыы иһин», А5а дойду Улуу сэриитигэр Улуу Кыайыы 30, 40, 50, 55 сылларыгар үбүлүөйдээх мэтээллэринэн на5араадаламмыта.

 

Автор: Л.Слепцов