Попов Федосий Гаврильевич (1927-1995 гг.)

 

Мин хос эhээм Попов Федосий Гаврильевич кулун тутар 18 күнүгэр 1929 сыллаахха Хахсыт нэhилиэгэр төрөөбүт. Кини аҕата Попов Гаврил Николаевич Хаҥалас Хахсытын олохтооҕо, гражданскай сэрии кыттылааҕа, кыhылларга тылбаасчыт уонна суруксут буола сылдыбыт киhи эбит. Онтон ийэтэ Попова Татьяна Михайловна Мэҥэ Хаҥалас Хаптаҕайыттан Отчут Дьөгүөрэптэртэн төрүттээх дьахтар. Бииргэ төрөөбүттэр алталар эбит.

Мин хос эhээм 1937 сыллаахха Чапаева диэн нэһилиэккэ, оскуолаҕа үөрэнэ киирбит. 10 километр сири күн аайы үөрэх ылаары төттөрү-таары хаамаллар эбит оччотооҕу оҕолор.

Былыргы оҕо быhыытынан хос эhээм кыра эрдэҕиттэн дьонугар көмөлөhөн от оттоон, мас мастаан, сүөhү көрөн улааппыт киhи. Ардыгар куобахтаан да дьиэлээхтэрин салгыыр эбит. Сэрии иннинэ олох олус күчүмэҕэй эбит. «Аhыыр ас кырыымчык буолан сороҕор аччыктыыр да этибит» — диэн бэйэтэ кэпсиир үһү.

1944 сыллаахха оскуоланы бүтэрэн, сэттэ кылаас үөрэхтээх диэн Народнай Комиссариат Свидетельствотын ылбыт. Онно сыаналара син үчүгэйдэр эбит. Саха тылыгар, литературатыгар, историяҕа, географияҕа туйгун, онтон геометрияҕа, физикаҕа уонна химияҕа орто сыаналаах буолан билиннилии эттэххэ гуманитарий эбит. Оскуоланы бүтэрэн баран, күтүөтэ Көстөкүүн салайар балыксыттар биригээдэлэригэр, «Кыhыл Сулус» колхозка, үлэлии киирбит. Кинилэр сайынын болуотунан уста сылдьан балыктаан, балыктарын приемнай пууннарга туттараллар, кыhынын быhыттаан оройуон, республика дьонун сыалыhарынан аhаталлар эбит. Манна үлэлии сылдьан «За доблестный труд в Великой Отечественной войне 1941—1945 гг.» диэн мэтээлинэн наҕараадаламмыт.

Сэттэ кылаастаах оскуоланы үчүгэйдик үөрэнэн бүтэрбит буолан, эhиилигэр куоракка рабфакка үөрэнэ киирбит. 1957 сыллаахха Төхтүргэ көһөн тахсыбыт уонна «Каландарашвили» колхозка сылгыhытынан үлэлии киирбит. Төхтүр биригэдэтэ куруук таhаарыылаах үлэлээх буолар — элбэх төрүөх ылар, сылгы ахсаанын көҕүрэппэт, онон социалистическай күрэхтэhии кыайыылааҕынан хаста да буолбуттар. Мин хос эhээм онно үлэлии сылдьан коммунистическай үлэ ударнига бэлиэннэн, Ленин 100 сыллаах үбүлүөйүгэр анаан тахсыбыт мэтээлинэн, хас да бочуотунай грамотаннан наҕараадаламмыт.

Эдэр сылдьан общественнай олоххо кыттара. Сааһын тухары лавочнай хамыыhыйа чилиэнэ буолан маҕаhыын учуотугар куруук үлэлэhэр үhү. Биир кэмҥэ месткомна талылла сылдьыбыт.

Мин хос эhээм айылҕаҕа сылдьарын, бултуурун, уонна кыра эрдээҕиттэн балыктыырын сөбүлүүрэ. Сааhын тухары иллэҥ кэмигэр дьарык оҥостон, бааттаах балыксыт аатын ылбыт.

1985 сыллаахха ыалдьан пенсияҕа тахсыбыт. Ол да буоллар кэргэнигэр көмөлөhө сатыыра, оҕолорун кытта окко киирсэрэ. Ол курдук олорон 1995 сыллаахха 65 сааhыгар бу сиртэн барбыта.

 

 

 

Автор: Неустроева М., 3 класс