Полятинский Куприян Иванови (1926-2000)

 

Куприян Иванович 1926 сыллаахха Кэбээйи оройуонугар Тыайа нэһилиэгэр 5-с оҕолоох дьиэ кэргэҥҥэ 2-с оҕонон төрөөбүтэ.

Кыра эрдэҕиттэн үлэҕэ эрдэ сыһыарыллан, олох оһоллорун, ыарахаттарын этинэн-хаанынан билэн улааппыта. Аҕата сылгыһыт, булчут буолан ыраах сирдэринэн сылдьан, бултаан хастыы да ыйга дьиэтигэр суох буолара үһү. Ол иһин кыра эрдэхтэриттэн ийэлэригэр көмөлөһөн от-мас бэлэмнэһэн, тасыһан тэҥҥэ үлэлииллэр эбит.

Аҕа дойду сэриитэ буолар сылыгар Куприян Иванович 15 саастааҕа. «М. Горькай» аатынан холкуоска бэйэтин саастыылаахтарын, улахан дьону кытта туох баар ыарахан үлэҕэ тэҥҥэ үлэлээн эйэлээх, дьоллоох олоҕу тутуспута, Улуу Кыайыыны тыылга уһансыбыта.

Эдэр сааһыгар сылгыһыттыы сылдьан оһоллонон инбэлиит буолан үлэтиттэн уурайарга күһэллибитэ.

Ол кэннэ 63 сааһыгар диэри оскуолаҕа оһох оттооччунан, харабылынан, дворнигынан үлэлээбитэ.

Тыыл ветерана. 9 оҕолоох, 21 сиэннээх, 24 хос сиэннээх.

Күн сириттэн 2000 сыл от ыйын 27 күнүгэр барбыта.

 

Авторы: Правнуки Никитины М,  В и В, учащиеся 2б и 1б классов