Поликарпов Михаил Егорович (1903 г.р.)

 

Мин хос эһэм Поликарпов Михаил Егорович 1903 сыллаахха Ньурба улууһун, Акана нэһилиэгэр, буор дьадаҥы ыалга төрөөбутэ. Аҕата Нуолах Дьөгүөр колхозка киирэн  “cаҥа хараҕын көрөн иһэн» 1935 сыллахха өлбүт.Мэхээлэ эдэр уолан сааһыгар нэһилиэккэ бастакы тэриллибит колхозка 1931 сыллаахха чилиэнинэн киирбитэ. Колхоһу тэрийиигэ активнайдык кыттыбыта. Бэйэтэ уерэнэн ааҕар, суруйар буолбута. Оччолорго нэһилиэккэ үөрэхтээх киһи суоҕун кэриэтэ этэ. Үөрэхтээх киһи буолан, нэһилиэк сэбиэтин сорудаҕынан Куочайга ШКМ ( Школа коммунистической молодежи) иһинэн аһыллыбыт агротехническай курска ыытыллыбыта. Курсун бүтэрэн  колхоһугар саҥа үлэлээн эрдэҕинэ, 1 Хаҥаласка саҥа тэриллибит наспоҕа (наслежное потребительское общество) ыскылаат сэбиэдиссэйинэн ылбыттара. Онон кооператор буолан хаалбыта. Онтон 1936 сыллаахха колхоһугар төннөн кэлэн илиитинэн үлэлээбитэ, биригэдьиирдээбитэ. Онтон тохтоло суох уон сыл суотчуттаабаты. Оройуоҥҥа бастыҥ суотчут кини этэ. Сир салаатын сорудаҕынан атын колхозтарга ревизияны элбэхтик ыыппыта Сорох колхозтарга годовой балансаларын оҥорон биэртэ. Үлэтиттэн 1948 сыллаахха көрдөһөн босхоломмута.Колхоһугар эмиэ илиитинэн үлэлээбитэ, бултаабыта. Лесхозтар киһи көрдөөбүттэригэр колхоһа Поликарповы биэрбиттэрэ. Үлэтигэр сирдэрбэтэҕэ.Элбэхтик хайҕаммыта, бириэмийэлэммитэ. Биһиги хос эһээбит Мэхээлэ дьоҥҥо-сэргэҕэ биллибит үчүгэй идэлээх. Кини сатабыллаах муҥхаһыт. Күөл кытыытыгар киирдэ да, ханан дириҥнээҕин тэһэ көрөн муҥхатын онно илдьэн түһэрэр. Кини тэрийэр муҥхата мэлдьи өлгөм балыктаах буолааччы. Сэрии сылларынааҕы аччыкка, Дьөҥкүүдэ эбэҕэ аан бастаан сааскы муҥханы тэрийбитэ. Сааскы мууһу аннынан туоналааһын араас ньымаларын олус бэркэ билэрэ. Улуу эбэ уон үс куоһаҕаһын эндэппэккэ билэрэ. Онон бастаан куоһаахтарын төгүрүйэ көтөн муҥхатын түһэрэрэ. Балыгы дириҥҥэ ыган киллэрэн-киллэрэн баран, бүтэһигэр эһэр балыгы хаста да сомсон ылара.Муҥхаҕа сылдьар кыаҕа суох тутаах үлэһиттэргэ, сүөһү көрөөчүлэргэ, сылгыһыттарга, от тиэйээчилэргэ, интернат оҕолоругар өлүү куталлара. Кини муҥхатынан элбэх аччыктаабыт киһи өрүһүммүтэ, өлөртөн куоппута.

Мин хос эһэм техникаҕа олус дьоҕурдааҕа биллибитэ. Нэһилиэккэ бастакы  “ Дружба” эрбии маастара буола сылдьыбыта. Ыаллар алдьаммыт дружбаларын көрөн биэрэр идэлэммитэ.

Поликарпов Михаил Егорович колхозка 30 тахса сыл үлэлээбитэ. Кэргэнин Даарыйатынаан биэс уонтан тахса сыл ыал буолан эйэ дэмнээхтик, биэс огону төрөтөн олорбуттара. Сэрии ыар сылларыгар эр киһилии үлэлээбитэ. Олус үөрүнньэҥ, кэпсэтинньэҥ этэ.

Михаил Егорович Поликарпов Акана нэһилиэгин биир бочуоттаах кыррдьаҕаһа. Үлэҕэ ситиһиилэрин иһин хас да медааллаах, элбэх грамоталардаах. 2003 сыллаахха 100 сааһын туолан, президент Кыһыл көмүс медалынан уонна 100 тыһыынча харчытын тутан үөрбүтэ-көппүтэ.

Кини киэҥ көҕүстээх, кытаанах санаалаах, улэьит, туохтан да самныбат саха сатабыллаах боростуой киһи буоларынан биһиги оҕолоро, сиэннэрэ, хос сиэннэрэ киэн туттабыт.

 

 

Автор: Тартакынова М., 10 класс