Петрова Евдокия Николаевна — Ооччуй (1911-1992 гг.)

Ооччуй — Евдокия Николаевна Петрова, 1911 с. Бүлүү улууһун Бөтүҥэр төрөөбүтэ. Бииргэ төрөөбүт бырааттара Баһылай, Макар, Хабырыыл диэннэр этэ.

Кинилэр үһүөн сэрии кыттыылаахтара. Баһылай, Хабырыыл сэрииттэн тыыннаах эргиллэн, төрөөбүт Бөтүҥнэригэр, эйэлээх олох тутуутугар харса суох үлэлээбиттэрэ. Баһылай налоговай аагынынан, маҕаһыыҥҥа атыылааччынан үлэлээбитэ. Хабырыыл Бөтүҥҥэ бастакы массыынаны сүүрдэн аҕалыаҕыттан, үлэни кыайар кэмин устата, суоппар этэ. Макар сэрии толоонугар охтубута.

Ооччуй 1935 с. Буденнай аатынан холкуоска киирбитэ. Онтон ыла 28 сыл устата ыанньыксытынан үлэлээбитэ. Кэлин холбоһуктааһын, бөдөҥсүйүү кэннэ Куйбышев аатынан, “Правда” холкуостарга, Степан Аржаков аатынан сопхуоска дойдутуттан ханна да халбарыйбакка үлэлээбитэ. Биэнсийэҕэ тахсан баран, ииппит уола Баһылай үөрэҕин бүтэрэн, сопхуос киинигэр Чинэкэҕэ көспүттэрэ. Ооччуй онно да олорботоҕо, орто оскуолаҕа кочегардаабыта, остуорастаабыта.

Ооччуй бу сыралаах үлэтин туоһулара: 1947 с. сэтинньи 6 күнүгэр Саха АССР Верховнай Сэбиэтин Президиумун Бочуотунай Грамотатынан бэлиэтэммитэ. “1941-1945 сс. Аҕа дойду сэриитигэр килбиэннээх үлэтин иһин” уонна Аҕа дойду Улуу сэриитин юбилейнай мэтээллэрдээх, үлэ, тыыл бэтэрээнэ. Евдокия Николаевна 1991 с. 81 сааһыгар бу олохтон барбыта.

 

 

 

Автор: В.Иванов Вадим, ученик 5 класса.