Пестерев Кирилл Николаевич

 

Хос эһэм Кирилл Николаевич Пестерев Чурапчы оройуонугар, Мэлдьэхси нэһилиэгэр дьадаҥы дьиэ  кэргэҥҥэ  атырдьах ыйын 22 күнүгэр  1922 сыллаахха төрөөбүтэ. Төрөппүттэрэ Пестерев Николай Петрович, Пестерева Дария Ивановна

Хос эһэм бииргэ төрөөбүт сэттиэлэр. Убайа Петр, хос эһэм Кирилл, балтылара Мария I, Мария II, Акулина, Александра, быраата Николай. Ол эрэн архыыпка киирбит докумуонунан кинилэр бииргэ төрөөбүт 11 оҕо эбиттэр. Елена, Иван, Петр II, Афанасий олох кыраларыгар күн сириттэн бараахтаабыттар.

1930 сыллаахха Мэлдьэхсигэ “Күндүл” начаалынай оскуолатыгар үөрэнэ киирбит, 1934 сыллаахха 12 саастааҕар үөрэнэн бүтэрбит. Оччотооҕуга усулуобуйа суоҕунан салгыы кыайан үөрэммэтэҕэ.

1936 сылга диэри кыра уол тахсан “Тахсыбыт сардаҥа”  колхуозка хонууга араас үлэлэргэ үлэлээбитэ.

1936 сыллаахха үэрэҕэ суох дьоннору ааҕарга, суруйарга үөрэтэр курс Районо иһинэн Чурапчыга аһыллыбыгар үөрэммитэ. Ити сыл алааһынан тарҕанан олорор үөрэҕэ суох дьоннору, ыаллары кэрийэ сылдьан ааҕарга, суруйарга үөрэппитэ.

1936 сыллаахха балаҕан ыйыгар Чурапчыга МТС иһинэн 3 сыллаах тырахтарыыстар курстара аһыллыбыта. Онно бэйэтин баҕа өртүнэн оччотооҕуга тиэхиникэ суолтатын өйдөөбөт дьоннор сөбүлээбэттэрин үрдүнэн үөрэнэ киирбитэ. Бу курсу 1939 сыллаахха олунньуга үөрэнэн  бүтэрбитэ.

1939 сыл олунньу ыйтан 1948 сыл сэтинньи ыйга диэри МТС-ка оройуон колхуозтарын кэрийэ сылдьан Одьулуунна, Хатылыга, Төлөйгө, Хоптоҕоҕо, Хадаарга тыаны солоон, сири хорутан бааһына оҥоруутугар үрдүк таһаарылаахтык үлэлээбитэ.

1948 сыл сэтинньиттэн 1949 сыл атырдьах ыйыгар диэри тырахтарыыстар биригэдьиирдэрин курсугар үөрэммитэ.

1949 сыл атырдьах ыйыттан 1954 сыл тохсунньу ыйга диэри МТС-ка тырахтарыыһынан үлэлээбитэ.

1954 сыл тохсунньуттан 1958 сыл ыам ыйыгар диэри МТС-ка тракторнай биригээдэҕэ биригэдьииринэн үлэлээбитэ.

1958 сыл муус устар ыйга “Сардаҥа”, “Коммунизм”, “Победа”, “Правда”, колхуозтар холбоһон бөдөҥсүйэн “Эрилик Эристиин” аатынан колхуоз буолбуттара. Партия райкомун бүрүөтэ бу колхуоһу бөҕөргөтүү бэрээдэгинэн хос эһэбин Пестерев Кирилл Николаевиһы мэхээнньигинэн анаан таһаарбыттара. Колхуоска мэхээнньигинэн 1974 сыл атырдьах ыйыгар диэри үлэлээбитэ.

1974 сыл атырдьах ыйыттан “Эрилик Эристиин” аатынан колхуоз, совхуоз буолбута. Совхуозка 1974 сыл атырдьах ыйыттан 1977 сыл муус устар ыйыгар диэри Хоптоҕо отделениятыгар мэхээнньигинэн тыраахтарнай пааркаҕа үлэлээбитэ.

Пенсияҕа тахсан баран 1977 сыл муус устар ыйтан, 1980 сыл алтынньыга диэри хачыгаарынан үлэлээбитэ.

1980 сылтан Хоптоҕо отделениятыгар тырахтарыыстаабыта.

Хос эһэм Кирилл Николаевич үлэтин кэнниттэн МТС-ка 5 сыл, Дириҥ орто оскуолатыгар 6 сыл тырахтарыыстар куурустарын үлэлэппитэ. Барыта 329 тырахтарыыстары бэлэмнээбитэ.

Хос эһэм Кирилл Николаевич үлэлиир кэмнэригэр хас да төгүл колхуоз управлениятын чилиэнинэн 1961 сыл оройуон сэбиэтин дьокутаатынан 1961с,1973с,1975 сылларга олохтоох сэбиэккэ дьокутаатынан быыбарданан үлэлээбитэ.

1969 сыл алтынньы ыйга Дьокуускайга колхуозтаахтар конференцияларыгар үс бииргэ төрөөбүттэр дэлэгээтинэн талыллан кыттыыны ылбыттара. Хос эһэм бииргэ төрөөбүт балтыларын кытта — Александра Николаевна — Октябрьскай Революция орден кавалера, Үлэ кыһыл Знамята орден кавалера, Коммунистическай үлэ ударнига. Мария Николаевна – Үлэ бэтэрээнэ, Коммунистическай үлэ ударнига.

Кирилл Николаевич Пестерев 1989 сылтан 1955 сылга диэри  комсомол чилиэнэ, 1955 сыл тохсунньу ыйтан Советскай Союз Коммунистическай Партиятын чилиэнэ. 1985 сыл кулун тутар ыйтан Саха АССР  Верховнай Сэбиэтин  Президиумун ыйааҕынан  олохтоох суолталаах  бэрсэнээлинэй пенсионер.

Хос эһэм ситиһиилээх үлэлэрэ партиянан, правительствонан үрдүктүк сыаналаммыттара. 1972 с. РСФСР Верховнай Сэбиэтин президиумун ыйааҕынан «РСФСР Үтүөлээх механизатора” бочуоттаах аат иҥэриллибитэ. 1941-1945 сылга Аҕа дойду Улуу сэриитин сылларыгар килбиэннээх үлэтин иһин мэтээлинэн, В.И.Ленин төрөөбүтэ 100 сылын туолуутугар килбиэннээх үлэ мэтээлинэн, фашистскай Германияны Кыайыы 30, 40 сылларын туолар үбүлүөйдэригар мэтээллэринэн, Үлэ бэтэрээнин мэтээлинэн наҕараадаламмыта.

Захарова Наталья Николаевналыын 1950 сыллаахха холбоһон ыал буолан 8 оҕону төрөтөн, 18 сиэннээхтэр, 35 хос сиэннээхтэр, 3 хос хос сиэннээхтэр. 1986 сыллаахха олохтон туораабыта.

 

 

 

Автор: С.Сыромятникова, ученица 1 класса.