Павлова Мария Софроновна (1931-2016 гг.)

 

Ньурба улууһун Күндээдэ нэһилиэгэр Кугдаар диэн сиргэ күн сирин көрбүтэ. Нулевой кылааска Араҥастаахха үөрэммитэ. Колхозка, кэлин совхозка хонуу араас үлэтигэр үлэлээбитэ.

Хос эбээм Мария Софроновна бэйэтэ суруйбут ахтыытыттан:

«Сэттэ биэрэстэлээх сиртэн оскуолаҕа сатыы барааччыбыт. Аччык буолары билбит дьоммут. Онтон «Чөҥөчөк» диэн сиргэ 5 сыл олорон баран, «Сталин» колхозка көһөн, кэлэн олорбуппут. Ийэм Февронья оскуоланы сууйар, биһиги ону сууйсан көмөлөһөр этибит. Эһэм уопсай дьиэҕэ остуорас. Онно оһох оттор, мас тиэйэр, оттон мин мас мастыыбын. «Кыталыктаах» диэн сиргэ сайын от мунньуһар этим. Аҕабыт Софрон Романович сэриигэ барбытын кэннэ, ийэм Февронья фермаҕа ыанньыксыттыы барбыта. Ол иннинэ ийэм оҕуруокка үлэлээбитэ. Онтон оҕолор туораах бурдук ичигэстиибит, сиэрпэҕэ илиибин быһа таппыт суолум билигин да баар. Биир сыл устата уопсай муҥхаҕа сылдьыспытым. Төһө балык кэлэрин билбэппит, ону үксүн государствоҕа туттараллар этэ. Сылдьыспыт оҕолорго 5-6 балыгы биэрэллэр этэ. Кыһын ынах тириитин талкынан имитэбит, каникулга итинник үлэлээн сылайыы бөҕө.Тирии субатын миин гынан иһээччибит. Мин табаарыстарым бары уолаттар этэ. Кинилэр тугу оонньуулларын барытын оонньуубун, кытыгырас этим»

Хос эбээм эдэр сааһыгар Аҕа дойду кыттыылааҕар, дэгиттэр талааннаах механизаторга, электрик, дизелист, моторист, тимиринэн уһанар идэлээх Киров колхозтан төрүттээх Степан Васильевич Николаевка кэргэн тахсыбыта. Степантан 4 кыыс уонна 4 уол оҕоломмута. Кинилэр күн сирин көрдөрбүт оҕолоро, оскуоланы бүтэрэн, үлэһит буолбуттара, билигин бэйэлэрэ эһэ, эбэ буолан олороллор.

 

 

 

Автор: С.Рожина, ученица 5 класса.