Павлова Александра Михайловна (1919 г.р.)

Дата рождения: 09.09.1919

Место рождения: Тонуо Кууну

Место работы: Совхоз

Биhиги тапталлаах эбээбит Павлова Александра Михайловна 1919 сыллаахха ыам ыйыгар 9 күнүгэр күн сирин көрбүтэ.

Аҕата Бөллөнөй Мэхээлэ — Павлов Михаил Павлович, Тонуо Кууну төрүт олохтооҕо.

Ийэтэ Павлова Аксиния Климовна (Өксүү), билиҥҥитэ Ньурба улууhуттан төрүттээҕэ элбэх оҕолоох сэниэ олохтоох Федоровтар диэн дьон кыыстара. Бииргэ төрөөбүттэрэ 4 кыыс, 1 уол эбиттэрэ үhү.

Эбээбит ыал улахан кыыhа буолан төрөппүттэригэр олох кыра эрдэҕиттэн күүс-көмө буолар эбит. Оҕо сааhыттан үлэҕэ эриллэн барыҥы бары сатыыр, дьиэ ис-тас үлэтин кыайар буола улааппыт. Бэйэтэ кэпсииринэн, ийэлэрэ дойдутугар Нурбалаатаҕына аҕата бултаан-балыктаан аҕалбытын барытын дьаhыйар, астыыр эбит үһү. Кырачаан балтыларын, быраатын көрсөрө.

Миигин былыргы саха тылынан ааҕарга, суруйарга эдэр суруксут уол үөрэппитэ. Ол уол кэлин аҕабыттан 15 эрэ саастаах кыыhы кэргэн кэпсэтэ сатаабыта, ону аҕам кыыс бэйэтэ биллин диэбитигэр, оҕо буоламмын куттанан аккаастаабытым — диэн эбээбит кэпсээччи.

Эбээбит Өлөксөөндүрэ элбэх оҕолоох дьиэ кэргэн иккис оҕолоро, улахан кыыстара.

Бииргэ төрөөбүт убайа Павлов Григорий Михайлович 1911 сыл төрүөх, Аҕа дойду Улуу сэриитигэр 1943 сыллаахха ыҥырыллан баран Сталинград куорат иһин уоттаах сэрии кыргыhыытыгар 1943 сыллаахха алтынньы 24 күнүгэр сырдык тыына быстыбыт. Көмүс уҥуоҕа Волгоградскай (Сталинградскай) уобалас Городищенскай оройуонун Кузьмичи бөhүөлэгэр тыhыынчанан саллааттар братскай көмүүлэригэр харылла сытар.

Улахан балта — Вера Михайловна 1921 сыл от ыйын 12 күнүгэр төрөөбүт. Кустаахха, Өргүөккэ олорбута, 5 оҕолоох.

Кыра балта — Федора Михайловна. Нурбаҕа олохсуйа сылдыбыта, кэлин Дьокуускай куоракка көспүта, 5 оҕолоох.

Быраата — Павлов Павел Михайлович (Почтальон Бааска) 1932 сыл от ыйын 15 күнүгэр төрөөбүт. Кэнтик олохтооҕо, 7 оҕолоох.

1926-27 сыллардаахха буолбут биэрэпис докумуоннарыгар хос эhэбит Павлов Михаил Бэллэнэй 45 саастаах, кэргэнэ Аксинья 35 саастаах, 6 оҕолоох дьиэ кэргэн эбиттэр.

Уолаттара Григорий — 14 саастаах (сын — диэн суруллубут), Николай — 12 саастаах, кыргыттара Александра — 7 саастаах, Вера — 4 саастаах, Степанида — 2 саастаах, Ольга — 6 ыйдаах диэн суруллубут. Бу алта оҕоттон Николай диэн уол, Степанида, Ольга диэн кырачаан кыргыттар дьылҕаларын хомойуох иhин билбэппит.

 

 

Автор: Бурнашев Д., 2 класс