Осипова Матрена Назаровна (1926-2014сс.)

 

Мин хос эбээм Осипова Матрена Назаровна – тыыл, улэ ветерана. Кини 1926 сыллаахха Таатта улууһугар Дьүлэй нэһилиэгэр төрөөбүтэ. Эрдэ тулаайах хаалан, эһэтигэр Ефимов Назар Аммосовичка иитиллэн улааппыта. Оскуолаҕа хойут киирэн 4 кылааһы ситэ бутэрбэтэҕэ. Сэрии саҕаланан оскуолатын быраҕан улахан дьону кытары тэҥҥэ улэлээбитэ.
Сааскы ыһыы үлэтигэр көлө сухатынан сир тиэрдэриигэ сылдьыһара, ыһыы кэннэ хортуоппуй олордуутугар. Сайынын Аччыгый өтөххө Оһоҕостоох Амматыгар оттоһоро.

Оччолорго от улэтэ барыта илиинэн улэлэнэрэ. Күһүн түүтэх баайыытыгар үлэлэһэрэ. Бэрт кыратык нуктаан ылар этибит диирэ. Ас эмиэ кэмчи. Астарын сыыһын иэдьэгэйтэн оҥоһуллубут хаппыт лэппиэскэ, тар сиэбитэ буолаат үлэлэрин сал5ыыллара. Сир-дойду хатан-кууран, сут-кураан буолан кыралыын-улаханныын бары биир курдук лабыкта хомуйан, хатыҥ сэбирдэ5ин тоноон, дул5аны быһыта сынньан, күөл былыыгын хостоон түүннэри-күнүстэри мөхсөллөрө. Үс туман түһүөр дылы сырытыннараллара диэн кэпсиирэ. Кыһын сүөһү көрөрө. Мастарын бэйэлэрэ кэрдэн, эрбээн оҕоһунан киллэрэн оһохторун оттоллор эбит. Уонна быыстарыгар куобах тириитинэн үтүлүк, кээнчи тигэн сэриигэ сылдьар дьоҥҥо ыыталлара. Таҥас-сап да үчүгэйэ суох буолан тоҥууну, аччыктааһыны этинэн-хаанынан билэн кинилэр эмиэ кыайыыны уһансыбыттара. Кыайыы буолбутун истэн үөрүү бөҕө буолан бырааһьыктаабыттар. Ким туох астааҕынан аһаан үнкүү, оһуохай бөҕө буолбуттар.

Мин хос эбээм улахан дьиэ кэргэн күн күбэй ийэтэ, сэттэтэ о5олонон, биэһин улаатыннаран, үөрэхтээн, үлэьит оҥорбута. Кини элбэх оҕолоох Ийэ знагынан наҕараадаламмыта.

Ити кэмҥэ ыанньыксыттыыр да, ньирэй да көрөр. 1964 сылтан сынньалаҥҥа барыар дылы Туора-Күел детсатыгар о5о иитиитигэр үлэлээбитэ. Эбээбит сэрии кэминэр сыралаах үлэтэ бэлиэтэнэн Сталин төбөтө мэтээлинэн наҕараадаламмыта, үбүлүөйдэринэн 6 мэтээллээх.

Биһиги бары Тапталлаах эбээбитин ахтабыт, саныыбыт, кининэн киэн туттабыт!

 

 

 

 

Автор: С.Сентизова Сайнара, 1 «б» кл. үөрэнээччитэ.