Ноговицын Антон Егорович кэргэнинээн Иванова Клавдия Прокопьевналыын

Ноговицын Антон Егорович – Күүстээх Онтуоска, мин аҕам эһээтэ.

1928 с. Сунтаар оройуонун III Бордоҥ нэһилиэгэр төрөөбүтэ. Үлэ, тыыл бэтэрээнэ. Олохтоох начальнай оскуоланы бүтэрэн баран, Элгээйи 7 кылаастаах оскуолатыгар үөрэнэ сырыттаҕына уот сэрии сыллара саҕаламмыттара. 1942 сылтан колхуоска үлэлиир. 1944 с. III Бордоҥ “Ворошилов” аатынан колхуос чилиэнэ буолар, суоччутунан үлэлиир.

Күүстээх Онтуоска диэн аат мээнэҕэ иҥпэтэҕэ. Кини атах оонньуутугар, сүүрүүгэ тэҥнээхтэрин олох тулуппата. Онтон тустуунан бастаан утаа үлүһүйбэт этэ, хойукка диэри улахан күүстээҕэ биллибэккэ, нам-бааччы сылдьыбыта. Сиһин этэ ситэн, буутун этэ буһан тустууга, хапсаҕайга элбэх ситиһиилэммитэ. Ол курдук ыһыахтарга тэҥнээҕин булбата, араас таһымнаах күрэхтэргэ чемпионнуура.

Күүстээх Онтуоска үөлээннээхтэрэ кэпсииллэринэн 200 л. бензин буочукатын массыына кузовар өрө көтөҕөн ылан уурара үһү, хайдах да бэйэлээх сылгыны хам баттыыра үһү. Биирдэ Онтуоска муҥутаан күүһүрэ, аатыра сылдьар кэмигэр тыаҕа бултуу тахсыбыт. Арҕахха сытар тыатааҕыга түбэспиттэр. Эмискэ кырдьаҕастара сулбу ойон тахсан Онтуоскаларын тиэрэ баттаабыт. Ону кини икки сыҥааҕыттан ылан өрө анньан сыппыт үһү. Ол икки ардыгар доҕоро эһэ хонноҕун анныгар ытан охторбут. Онтуоска ол киирсииттэн уҥуоҕа да хамсаан көрбөтөх этэ. Көҥкүйэлээх үрэҕэр биир улахан баайтаһын биэ көлөттөн өлбүтүн, сыыр үөһээ тардан таһаараары эппин-сииммин алдьаппытым диэн кэлин бэйэтэ кэпсиирэ эбит.

Ноговицын Антон Егорович – Күүстээх Онтуоска кадровай булчут,  хапсаҕайдьыт, сопхуос тутаах үлэһитэ этэ.

“1941-1945 сс. Аҕа Дойду Улуу сэриитин кэмигэр килбиэннээх үлэтин иһин”, “Улуу Кыайыы 20, 30, 40, 50 сс.” юбилейнай мэдээллэринэн наҕараадалламмыта.

Иванова Клавдия Прокопьевналыын 2 кыыс оҕоломмуттара. Билигин кинилэр сыдьааннара тэнийэн, кэҥээн Сахабыт сирин араас улуустарыгар тарҕанан олороллор.

Алексеев Х.,

Тулагы орто оскуолатын 10 кыл. үөрэнээччитэ