Николаева Валентина Петровна (1917 г.р.)

Эбэбит 1917  сыллаахха  Өлүөхүмэ оройуонугар Кыыллаах нэһилиэгэр күн сирин көрбүтэ.

1925  сыллаахха Кыыллаах 4 кылаастаах оскуолатыгар үөрэнэ киирбитэ, ону бүтэрэн  2 Нөрүктээйи 7 кылаастаах оскуолатыгар үөрэнэн 1934с. Бүтэрбитэ.

1934-1935сс. Дьокуускай куоратка Пушной техникума үөрэнэ сылдьан ыалдьан, үөрэммэтэҕэ.

Сайын 1937с. Искусства управлениятын линиятынан драматическай кружок салайааччытын куурсун бутэрэн, Тааттаҕа социально-культурнай салаатыгар художественнай руководителлинэн ананан 1938с.дылы үлэлээбитэ.

Онтон. 1939 с. Комсомолга киирбитэ, НКВД районнай отделыгар деловодитель-архивариус дуоһунаһыгар үлэлээбитэ. Онтон Райкомол ыҥырыытынан Баайаҕа оскуолатыгар пионервожатайынан улэлээбитэ.

1941с. Учууталлар курстарын бутэрэн Уолба оскуолатыгар учууталынан анаммыта. Манна эһэбитин көрсөн, тапталларын холбоон ыал буолбуттара. Сэрии сылларыгар , аас-туор олоххо, үүнэр көлүөнэнии үөрэтиигэ, патриотическай иитиигэ сыраларын уурбуттара, учуутал-иитээччи быһыытынан өрө күүрүүлээхтик үлэлээбиттэрэ.

Эбэбит, Валентина Петровна 1950 сылга дылы учууталынан, иитээччинэн үлэлии сылдьан Уолба нэһилиэгин сельскай советын председателинэн талыллан  өр сылларга нэһилиэк, оройуон, республика хаһаайыстыбата уонна культурата чэчирии сайдарыгар бэйэтин кылаатын киллэрбитэ. Ол кэмнэргэ сельскэй совет председателэ диэн билиҥҥинэн Аҕа баһылык этэ.

Бу сыралаах, дьон олоҕун – дьаһаҕын кытта  ыкса ситимнээх, нэһилиэк, оройуон, республика  сайдыыта, совхоз бүппэт түбүгэ- кыһалҕата, оҕо-ыччат сайдыыта барыта нэһилиэк советын улэһиттэрин санныларыгар сүктэриллэ сылдьар баттык  этэ. Валентина Петровна туохтан да чаҕыйбат, хорсун санаалаах идейнэй коммунист, пропагандист, агитатор бэрдэ этэ.

Олорон ааспыт олоҕун, үлэтин  туоһулууллар элбэх махтал суруктар, Саха АССР  Үрдүк Сэбиэтин Президиумун,  Саха облаһын ССКП Киин комитетын Почетнай грамоталара,  Советскай Союз государственнай наградалара — “За трудовую  доблесть в Великой Отечественной войне  в 1941- 1945гг.”, «За трудовое отличие “, “За трудовую доблесть в ознаменование 100 –летие В.И. Ленина”. Оччолорго нэһилиэккэ налоговай агент диэн баара, Таатта оройуонун финансовой отделын иһинэн.

Эбэбит Валентина Петровна бу ыарахан идэни толору баһылаабыта, ол курдук үрдүк таһаарылаах үлэтинэн младший советник финансовой службы 2 ранга диэн звание ылбыта туоһулуур.

Эбэбит асчыт , иистэнньэн бэрдэ этэ, илиитинэн уонна иистэнэр массынанан мааны таҥаһы, сахалыы таҥастары уонна үлэҕэ, булка кэтэр таҥаһы тигэрэ.

Биһигини, сиэннэрин кинигэ ааҕарга, кэрэни, ырааһы, сырдыгы  өрө тутарга  угуйарын махтана саныыбыт.

Ааспытын да иһин  эһэбит, эбээбит үтүө үлэлэрэ , норуоттарыгар, эдэр көлүөнэҕэ сыһыаннара , сырдык санаалара дьон-норуот махталын ылбыта. Кинилэр  олохторо, үлэлэрэ билиҥҥэ диэри биһиэхэ – сиэннэригэр үтүө холобур буолар.

 

Автор: Э.Колодезников, 5 в кылаас.

Эбээ Валентина (1)