Неустроева Мария Ивановна (1921 г.р.)

Мин хос эбээм, тыыл ветерана Неустроева Мария Ивановна 10.03.1921 сылга төрөөбүтэ. Кини Таатта улууһун Баайаҕатыгар Кутаама колхозка үлэлии сылдьан өстөөх саба түспүтүн истибитэ. Сэрии кэмигэр эбээ колхоз бригадирынан үлэлээбитэ. Кыһынын от-мас тиэйиитэ, уокка оттор маһы саһааннааһын, саас ноһуом таhыыта, ыһыыга бэлэмнэнии, бурдук ыһыыта, сайынын сир паардааһына, от үлэтэ, бурдук быһыыта уонна да атын үлэттэн чаҕыйбакка, ылсан иhэрэ.

Эбээм ахтыытыттан быһа тардыы: «1942 сыл сайына уот кураан, сут улахана саҕаламмыта. Бурдук үүммэтэҕэ, ол кыһын дьон хоргуйуута, киһи-сүөһү өлүүтэ элбэх этэ. Биһиги олорор дьиэбитигэр кыаллыбат, ыран охтубут дьону муспуттара. Бу дьону үлэм быыһыгар мин көрбүтүм. Онно-манна сутаан өлбүт сүөһү, сылгы этин  аҕалан түӊэтэн биэрэрим. Бу дьоӊӊо лимиит бурдуктара ыйга 1,5 эрэ киилэ, онон бурдукпутун ый бүтүүтэ тиэрдээри, ууга үөрэ отун кырбаан, ньуосканан бурдук кутан убаҕас хааһы оӊорон сиэтэрим. Дьонум эрэйдээхтэр мин кэлэрбин кэтэһэллэр, тугу эмэ аҕаллахпына наһаа үөрэллэр этэ.»

Үлэлэрин быыһыгар куобах үтүлүк, бэргэһэ, итии таӊас тигэн фроӊӊа ыыталлара. Алтан сылыбаары, чаанньыгы, солууру хомуйаллара.

Эбээм сэрии кэнниттэн балыыһаҕа, оҕо санаторийыгар үлэлээбитэ. Кини ийэ, эбээ буолан, сиэннэрин, хос сиэннэрин көрбүтэ, өрүү минньигэс астаах, сылаас алаадьылаах, дьэдьэннээх күөрчэхтээх, сымнаҕас майгылаах, мичээрдии сылдьар эбээ этэ.

Биһиги колхуостаахтарбыт туохха да кэмнэммэт хорсун быһыыны көрдөрбүттэрин сырдатыы, кинилэр сырдык ааттарын үйэтитии биһиги эбээһинэспит.

 

 

Автор: А.Ноговицын 8б кылаас үөрэнээччитэ